Banorët në Reçak po kundërshtojnë operimin e gurëthyesve afër Kompleksit Memorial

Shumë afër Kompleksit Memorial dhe vendit ku ka ndodhur masakra e Reçakut të Shtimes, institucionet lokale dhe ato qendrore kanë dhënë leje dhe pëlqime që të zhvillohen bizneset e gurthyesve në pronë publike.

Por kjo po kundërshtohet nga banorët, të cilët kanë dorëzuar peticion e ankesa në të gjitha institucionet, siç thonë, për t’i mbrojtur kufijtë e fshatit.

Banorët kanë thënë se nuk do ta lejojnë funksionimin e gurthyesve afër shtëpive të banimit dhe afër Kompleksit Memorial me arsyetimin se degradohet ambienti.

Por shumë afër këtij lokacioni jetojnë edhe banorët e lagjes “Beqiri” nga Reçaku, të cilët kanë thënë se gurthyesit e rrezikojnë edhe jetesën e tyre nga pjesa e epërme e fshatit.

Në Komunën e Shtimes kanë thënë se lejen për operim të gurthyesve në këtë zonë e ka dhënë Ministria e Ambientit dhe Komisioni për Miniera dhe Minerale, ndërkaq Komuna u ka dhënë vetëm pëlqime sipas Planit Zhvillimor Komunal.

Banorët kanë thënë se nëse Komuna nuk angazhohet për t’u dalë në ndihmë banorëve, atëherë do të organizojnë protestë para objektit të Komunës.