Hajriz Latifi jeton pak metra larg liqenit të Batllavës, megjithatë ujin e pijes e siguron nga pusi.
Thotë se tashmë është plakur dhe se kjo mënyrë e të marrit ujë është shumë e lodhshme për të.
Fshati Orllan, ndonëse është i rrethuar nga uji, nuk e ka ende rrjetin e ujësjellësit dhe kanalizimit. Mungesa e ujit në këtë fshat po iu shkakton probleme edhe bizneseve.
Në komunë thonë se në bashkëpunim me Ujësjellësin Rajonal Prishtina dhe Ministrinë e Mjedisit, do të ndërtojnë ujësjellësin për këtë fshat. Dita Botërore e Ujit pa ujësjellës i gjen edhe banorët e komunës së Fushë Kosovës.
Gjysma e qytetit të Fushë Kosovës nuk është e kyçur në fabrikën e ujit në Shkabaj, për shkak të një gypi prej 2.5 km që kushton rreth 600 mijë euro.
E në Kompaninë Rajonale të Ujësjellësit thonë se janë duke punuar në drejtimin e sigurimit të mjeteve financiare për ta blerë këtë gyp dhe në momentin e sigurimit, ujësjellësi e ka bërë gati projektin për ekzekutim, pasi që bëhet fjale për shumën e papërballueshme për ujësjellësin.
Ujësjellësi ka kërkuar ndihmë financiare edhe nga Qeveria e Kosovës, ku disa javë më parë kanë dërguar kërkesën e dytë të radhës në MZHE dhe MF, por që ende nuk kanë kthyer përgjigje. Gjatë ditës, edhe Televizioni ka kërkuar përgjigje nga këto ministri por nuk kanë kthyer përgjigje.