Bajrami takon rektorët e universiteteve publike, diskutohet çështja e programeve të paakreditura

Ministri i Arsimit, Shkencës dhe Teknologjisë, Arsim Bajrami ka zhvilluar një takim me rektorë të Universiteteve Publike të Kosovës, me të cilët ka diskutuar çështjen e disa programeve studimore të paakreditura në vitin akademik 2010/2011 dhe 2011/2012, të fushës së Edukimit.

Ministri dhe rektorët u pajtuan që kjo çështje ka nevojë të trajtohet urgjentisht, në mënyrë që studentëve e këtyre dy gjeneratave t’u evitohen pengesat e caktuara administrative.

Bajrami, gjithashtu tha se “trajtimi i këtij problemi dhe zgjidhja adekuate do të arrihet në bashkëpunim dhe bashkërendim institucional, mes Universiteteve, Konferencës së Rektorëve, MASHT-it dhe AKA-së”.

Në kuadër të Universitetit të Prishtinës “Hasan Prishtina”, Fakulteti i Edukimit ka zhvilluar programet lëndore, të cilat nuk kanë respektuar rekomandimet e AKA-së, si dhe programe të njëjta të organizuara në kuadër të Degës së Fakultetit të Edukimit, në Prizren.