Avokati i Popullit, Naim Qelaj, ka paralajmëruar se ky institucion do të kryejë hetim të thellë dhe shumëdimensional për shkeljet e mundshme ligjore në rastin e vdekjes së 4-vjeçares në Gjakovë.
Të enjten në “60 Minuta” të KTV-së, Qelaj ka thënë se ky institucion nuk do ta pengojë apo të ndikojë në punën e autoriteteve përkatëse, por se do t’i mbikëqyrë hetimet se a po zhvillohen në pajtim me legjislacionin.
“Hetimi do të jetë shumë i thellë, shumëdimensional dhe pa dashur të pengojmë, ndikojmë apo të ndërhyjmë në punët e autoriteteve tjera, ne do të dalim me një raport me konstatime të qarta nëse ka pasur shkelje dhe cilat masa duhet t’i marrë shteti që këto raste të mos ndodhin në të ardhmen”, ka thënë ai.
Qelaj ka shtuar se gjatë ditëve në vijim do të kontaktohet edhe familja e viktimës për t’u informuar në lidhje me atë nëse i është mohuar qasja në të gjitha informatat e nevojshme për gjendjen e fëmijës gjatë trajtimit.
“Ditëve në vijim zyrtarët e institucionit padyshim që do të kontaktojnë dhe ta marrin deklaratën e familjarëve. E drejta e prindit për të qëndruar afër fëmijës në situata të tilla dhe për tu informuar, të ketë qasje në të gjitha informatat e nevojshme është e drejtë bazike që nëse u është mohuar, padyshim që paraqet problem në vete dhe shqetësim të shtuar të krejt kësaj që ka ndodhur”, ka theksuar ai.
Avokati i Popullit ka njoftuar se edhe më parë kanë pranuar ankesa të shumta nga qytetarët që lidhen me të drejtat e mbrojtjes shëndetësore, por në vazhdimësi rekomandimet e këtij institucioni kanë mbetur të pazbatuara.
“Autoritetet të respektojnë dhe t’i zbatojnë rekomandimet e Avokatit të Popullit. Vitin e kaluar kemi dalë me një raport të veçantë për shëndetin riprodhues dhe me problematikat që kanë dalë si rezultat i takimeve të rregullta që i kemi pasur me grupe të caktuara, kryesisht të grave që kanë marrë shërbime në këtë shërbim publik dhe situata ka dalë vërtetë jo e mirë në kuptimin e respektimit të të drejtave të njeriut, të dinjitetit të pacientit, mungesa e pajisjeve të përshtatshme, mungesa e kushteve për t’i siguruar privatësi gjatë marrjes së shërbimeve e shumë defekte të tjera. Na ka dalë që përkundër vullnetit e gatishmërisë për t’iu përgjigjur rekomandimeve tona një numër i madh i rekomandimeve kanë mbetur të pazbatuara”, ka thënë ai.
Qelaj ka thënë se në hetimet e kryera nga Avokati i Popullit, kanë hasur në shumë raste kur qytetarët që i takojnë komunitetit joshumicë në Kosovë janë diskriminuar.
“Duam apo nuk duam ta pranojmë, trajtimi në raport me qytetarët që i takojnë komunitetit joshumicë në Kosovë në shumë raste ka rezultuar me dallim, me trajtim ndryshe e që në gjuhën që ne e përdorim, gjuhën juridike, konsiderohet diskriminim, pasi trajtimi ndryshe bëhet për shkak të përkatësisë etnike, ngjyrës, racës, ka raste pse është grua apo i moshuar. Në hetimet që ne kemi kryer në shumë raste ka reduktuar që komuniteti rom, ashkali dhe egjiptian në përgjithësi është i predispozuar të paragjykohet dhe pastaj edhe të diskriminohet, na ka rezultuar edhe te rasti i raportit që e përmenda”, ka thënë ai.