Institucioni i Avokatit të Popullit ka shprehur shqetësimin lidhur me videot e publikuara, në Prishtinë dhe Gjakovë, ku dy fëmijë rrihen nga bashkëmoshatarët e tyre, duke shtuar se dhuna ndaj dhe në mes të fëmijëve është e patolerueshme.
“Të gjitha format e dhunës dhe keqtrajtimit rrezikojnë dhe dëmtojnë integritetin fizik, mental dhe moral të fëmijës si dhe përbëjnë një shkelje të të drejtave themelore të fëmijës, të përcaktuara me Konventën për të Drejtat e Fëmijës, Kushtetutën e Republikës së Kosovës dhe Ligjin për Mbrojtjen e Fëmijës”, thuhet në reagimin e këtij institucioni.
Ai ka bërë thirrje që fëmijët duhet të mbrohen nga dhuna, veçanërisht në institucionet arsimore.
“Ligji për Mbrojtjen e Fëmijës obligon institucionet të zhvillojnë dhe zbatojnë politika dhe programe me qëllim të sigurimit të mbrojtjes së fëmijës, parandalimit të rrezikut për jetën dhe ҫfarëdo lloj dhune. Fëmijët duhet të mbrohen nga dhuna pavarësisht vendit ku kryhet, e veçanërisht në institucionet arsimore”, thuhet më tej në reagimin e Avokatit të Popullit.
Avokati i Popullit në fund u bëri thirrje shkollave përkatëse, Policisë së Kosovës dhe Ministrisë së Arsimit për të bashkëpunuar sa më shumë me shkollat, në mënyrë që probleme të tilla të shmangen.
