Arbnora Luta
Programe mbështetëse për zhvillimin e bujqësisë në vlerë prej 8 milionë eurosh ka dhënë Ministria e Bujqësisë, pa një analizë paraprake.
Raporti i Auditorit të Përgjithshëm për menaxhimin e subvencioneve në bujqësi, i publikuar të mërkurën, tregon se ka mangësi në mënyrën e menaxhimit të dhënies së granteve dhe subvencioneve për fermerët, raporton KTV.
Auditimi ka nxjerrë në pah se ka projekte të investuara që nuk janë aktive e që kanë ndikim të drejtpërdrejtë në mos-zhvillimin e bujqësisë dhe rritjen e punësimit.
“Dështimi në themelimin e strukturave sipas rregullave për Asistencë në Para-Anëtarësim për Zhvillim Rural, ka bërë që Kosova, për dallim nga vendet e rajonit të mos përfitojë fonde nga Bashkimi Evropian për sektorin e bujqësisë”, theksohet në raport.
Sipas Auditorit të përgjithshëm, mungesa e komunikimit mes Ministrisë së Bujqësisë dhe komunave ka mundësuar që aplikuesit e njëjtë të përfitojnë fonde nga niveli qendror dhe ai lokal.
Kjo kishte ndodhur në Komunën e Prishtinës, ku Auditori ka gjetur se fermerët nuk janë përzgjedhur sipas kritereve të përcaktuara, e në disa raste kishte munguar dokumentacioni i plotë.
ZAP-i në këtë raport, ka dhënë një varg rekomandimesh për Ministrinë dhe Komunat, siç është: sigurimi që programet të miratohen vetëm atëherë kur janë një vijë me buxhetin.
Ministria e Bujqësisë çdo vit, për subvencione miraton rreth 27 milionë euro, derisa kjo ministri vazhdimisht është udhëhequr nga partitë e komuniteteve në Kosovë.
