As Qeveria e as opozita ende s’kanë dërguar komente në ZRRE për çmimin e rrymës

Edhe tre ditë afat kanë mbetur që palët e interesit të dërgojnë komentet e tyre në Zyrën e Rregullatorit për Energji lidhur me bllok-tarifat. Nga Qeveria e Kosovës kanë thënë se ende nuk i kanë dërguar komentet, meqë janë në proces të hartimit të tyre. Përveç Qeverisë, deri tani, sipas një njoftimi të ZRRE-së, asnjë subjekt politik nuk ka dërguar komente, mes tyre as partitë opozitare, të cilat e kanë kundërshtuar fuqishëm shtrenjtimin e rrymës.

Deri më 31 janar do të zgjasë afati për dorëzimin e komenteve të palëve të interesit në Zyrën e Rregullatorit për Energji, lidhur me propozimin e kësaj të fundit për shtrenjtim të rrymës.

Por, deri më tani as Qeveria e asnjë subjekt politik opozitar nuk i është drejtuar ZRRE-së me komente, ani pse shtrenjtimin e rrymës e kanë kundërshtuar fuqishëm.

Në një njoftim që ka lëshuar Zyra e Rregullatorit, ka bërë të ditur se deri më sot ka pranuar komente nga Sekretariati i Komunitetit të Energjisë në Vjenë, Instituti për Politika Zhvillimore, KOSTT-i, KEDS-i dhe KESCO.

Ndër rekomandimet e Komunitetit të Energjisë në Vjenë është që pragu i propozuar deri në 600 kW të rritet pak dhe konsumatorëve që shpenzojnë deri në pragun e rritur, t’u shtrenjtohet energjia elektrike për 5 për qind. Ata kanë propozuar edhe një rritje lineare edhe për bizneset.

E ndër rekomandimet e INDEP-it janë që tarifat e energjisë elektrike të rriten për 5.5 për qind për të gjithë konsumatorët dhe kategorizimi të bëhet në tri blloqe.

Edhe Arbëri 10 pri 2026 ZRRE-ja propozon që sivjet të mos ketë shtrenjtim të energjisë

Nga Qeveria në një përgjigje për KOHËN kanë thënë se ende janë duke i hartuar komentet e tyre dhe se të njëjtat do t’i dorëzojnë brenda afatit ligjor. Ekzekutivi është përgjigjur edhe rreth kërkesave të qytetarëve për mosaprovim të bllok-tarifave.

“Qeveria nuk ka kompetenca apo fuqi të miratojë apo të refuzojë vendimet e ZRRE-së. ZRRE-ja është organi i pavarur dhe duhet të mbetet e të trajtohet i tillë. Ajo çfarë mund të bëjë Qeveria dhe në çka po angazhohet maksimalisht është që nëpërmjet masave afatshkurtra, përkatësisht, përmes zotimit për subvencionim të energjisë elektrike të zbusë ndikimin e kësaj krize globale energjetike te qytetarët e saj, teksa finalizon hartimin e Strategjisë për Energji, e cila synon zgjidhje afatgjate në fushën e energjisë. Qeveria është duke i finalizuar komentet e saj. Ato do të dorëzohen brenda afatit të përcaktuar. Ne do të mund t’i publikojmë ato vetëm pas dorëzimit të tyre”, thuhet në përgjigjen e Qeverisë.

Deri të premten, as partitë opozitare të cilat po e kundërshtojnë për shtrenjtim, nuk kanë dërguar komente.

Nga Lidhja Demokratike e Kosovës dhe Aleanca për Ardhmërinë e Kosovës nuk i janë përgjigjur KOHËS, derisa nga PDK-ja, deputeti Ferat Shala ka thënë se komentet e partisë i ka propozuar tashmë në Komisionin Parlamentar ku ka qenë i pranishëm edhe Bordi i ZRRE-së.

Edhe Arbëri 12 maj 2025 ZRRE: Vendimet për tarifa janë kompetencë ekskluzive e jona, asnjë institucion s’ka mandat t’i anulojë

Shala ka thënë se nuk kanë rekomandime, pasi që kërkojnë që ZRRE-ja ta hedhë poshtë tërësisht raportin me propozime.

Kundër shtrenjtimit të rrymës, nesër, në orën 14:00 Paria Socialdemokrate pritet të mbajë protestë.