Anulohet vendimi për mandatin e dytë të drejtorit të Doganave të Kosovës

Pak ditë para së të largohej nga Qeveria, ish-kryeministri Ramush Haradinaj ishte kujdesur që t’ia vazhdojë mandatin edhe për 3 vjet drejtorit të Doganave, Bahri Berishës.

Por emërimi për mandat të dytë nga Haradinaj, KTV-ja kishte raportuar se u bë në formë të jashtëligjshme.

Kjo ngase nuk u respektua Kodi Doganor i Kosovës, i cili parashihte shpalljen e konkursit për këtë pozitë.

E pa kaluar as një muaj nga ky vendim, pas marrjes së drejtimit të Ministrisë së Financave, Besnik Bislimi ka anuluar atë shkaku i mosrespektimit të procedurave ligjore, raporton KTV.

Ky dikaster tashmë ka hapur konkursin e ri për drejtor të përgjithshëm të Doganës së Kosovës.

“Në përputhje me nenin 5 të Kodit Doganor dhe të Akcizave, ministri i Financave dhe Transfereve, shpall konkursin për drejtor të përgjithshëm dhe themelon komision për përzgjedhjen e kandidatit të rekomanduar, të cilin më pastaj e emëron kryeministri i Republikës së Kosovës”, thuhet në përshkrimin e përgjithshëm të konkursit.

Edhe Arbëri 12 shk 2020 Shpallet konkurs për drejtor të Doganës, edhe pse Haradinaj ia kishte vazhduar mandatin

Kohavisioni ka provuar të marrë edhe një qëndrim nga drejtori aktual Bahri Berisha, por ai nuk u është përgjigjur thirrjeve të televizionit.

Vazhdimin e mandatit për drejtorin e Doganës, ish-kryeministri Haradinaj e kishte bërë të ditur vetëm në rrjetet sociale.