Ambasadori spanjoll në Serbi: Nuk do ta njohim Kosovën edhe nëse hapim zyre

Ambasadori i Spanjës në Beograd, Raul Bartolome Molina, ka thënë se shteti i tij nuk do ta pranojë pavarësinë e Kosovës dhe se ky qëndrim nuk do të ndryshojë, as kur Spanja të hapë zyre në Prishtinë.

Molina gjatë një interviste për mediat në Serbi ka thënë se qëndrimi i shtetit të tij ndaj Kosovës është i qartë dhe i pandryshueshëm. Derisa, sipas tij, Spanja gjithmonë është thirrur në respektimin e Rezolutës 1244 të OKB-së dhe  gjithmonë ka kërkuar që të respektohen marrëveshjet e Brukselit.

“Bëhet fjalë për një pozicion i cili është në përputhje me të gjithë akterët politikë dhe bazohet në respektimin absolut të ligjit ndërkombëtar nga Spanja. Pavarësia e njëanshme që ky territor ka shpallur më 2008 paraqet shkelje të parimeve themelore të integritet territorial”, ka thënë ai.