Akuzohet për nxitjen e urrejtjes kundër atyre që janë “paditur” për krime lufte

“Të keni turp që keni ardhur, sepse ju nuk jeni të mirëseardhur, ne e dimë shumë mirë kush jeni ju, ju me vratë sot për të tretën herë dhe ardhja juaja është provokim për neve”, janë fjalët me të cilët Asim Cenaj, u është drejtuar disa qytetarëve të komunitetit serb, ish-banorë të kësaj komunë që kishin vizituar Deçanin, tre muaj më parë.

Deklaratat e thëna në takimin e organizuar në Asamblenë Komunale, kanë qenë arsye që Prokuroria e Komunës së Pejës ka ngritur aktakuzë ndaj tij, shkruan sot Koha Ditore.

Vepra penale të cilën prokuroria pretendon që e ka kryer Cenaj është nxitje e urrejtjes, përçarjes ose e jotolerancës kombëtare, racore, fetare ose etnike.

Cenaj, shërbyes civil në Komunën e Deçanit, në dhjetor të vitit të kaluar ka diskutuar për fatin e të pagjeturve në një takim të mbajtur në Asamblenë Komunale të Deçanit, e ku ishin të pranishëm edhe përfaqësues të organizatave të vendit e ndërkombëtare, si dhe ish-banorë të kësaj komune nga komuniteti serb. Këta të fundit kanë ardhur në Deçan në kuadër të nismës “Vizito, shko dhe shiko!”, të organizuar nga Këshilli Danez për Refugjatë. (Artikullin e plotë mund ta lexoni në numrin e sotëm të Kohës Ditore).

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.