Mehmet Ademi ka filluar punën e tij të zakonshme në Tregun e Gjelbër të Prishtinës.
Megjithatë, sikur çdo biznes tjetër, ai thotë se pandemia i ka prekur edhe tregtarët të cilët për më shumë se dy muaj me urdhër të Qeverisë pushuan aktivitetin e tyre.
Ademi thotë se atyre iu premtua lirim nga pagesa e qirasë gjatë kohës kur Tregu i Gjelbër u mbyll, por shton se ky vendim nuk është respektuar nga AKP-ja, raporton KOHA.
Ai thekson se e kanë të pamundur pagesën e faturave që Agjencia Kosovare e Privatizimit i ka dërguar në adresë të tyre.
Të tjerë tregtarë thonë se vendimi për mbylljen e tregut u erdhi papritur, gjë që pamundësoi shitjen e shumë produkteve të tyre.
Ata shtojnë se në vend të obligimeve tatimore institucionet e vendit do të duhej t’u ndihmonin për të dalë nga kriza që, sipas tyre, më së shumti i ka prekur ata.
Në një përgjigje për KTV-në, Zyra për media e AKP-së ka thënë se është duke analizuar mundësitë për lehtësim të detyrimeve të qiramarrësve.
“Të gjithë qiramarrësve u janë dërguar faturat sipas kontratës, për shkak se faturimi dhe inkasimi janë dy veprime të ndryshme. Krahas faturave, te gjithë qiramarrësit janë njoftuar edhe për vendimin e Bordit të publikuar në të gjitha mediat me datë 27 mars, me të cilin shtyhen për 3 muaj pagesat e qirave duke filluar nga data 24.03.2020. Megjithatë, AKP, në konsultim edhe me institucionet tjera të Republikës së Kosovës është duke i analizuar mundësitë dhe modalitetet ligjore dhe praktike për lehtësimin e detyrimeve të qiramarrësve ndaj NSH-ve për periudhën e mosfunksionimit apo funksionimit të pjesshëm gjatë pandemisë”, thuhet në përgjigjen e AKP-së.
