Sekretari Organizativ i Lidhjes Demokratike të Kosovës, Arban Abrashi, ka thënë se kryeministri Albin Kurti, ka shkaktuar krizë në koalicion për t’iu ikur përgjegjësive shtetërore.
Ai thotë se këtë e bëri edhe për të fshehur raportet e tendosura me SHBA-në.
Abrashi përmes një postimi në Facebook, ka thënë se “përpjekja e Kurtit për t’u fshehur prapa gjendjes së pandemisë është e kot.
“Shumë të tjerë para VV-së kanë provuar ta nënshtrojnë LDK-në, por historia ka treguar se ne jemi rreshtuar në anën e drejtë dhe kemi qëndruar të pathyeshëm. Partneritetin dhe miqësinë me Amerikën dhe BE-në, LDK-ja nuk e zëvendëson me projekte të izolimit dhe kapitullimit të shtetit”, ka shkruar ai.
Ai thotë se është e natyrshme që qytetarët të kërkojnë unitet politik dhe më shumë tolerancë ndërmjet partive politike, për shkak të gjendjes me koronavirusin.
“Mënyra më e mirë për të kërkuar unitet është duke treguar tolerancë me shembullin personal, nëpërmes ofrimit të opsioneve, ashtu siç ka bërë LDK-ja dhe kryetari Mustafa, duke ofruar vazhdimisht mundësi bashkëpunimi me VV-në. Por, nuk mund të kërkohet unitet e tolerancë, nga ata që bëjnë kërcënime, linçime, shpallje tradhtarësh, sulme fizike ndaj gazetarëve, dhe fushata denigruese në rrjetet sociale ndaj personaliteteve politike dhe shtetërore”, ka thënë ai.
Edhe
Abrashi: Letra kërcënuese e Kurtit ndaj Kushtetueses është sinjal për rrëshqitje në diktaturë
Ai duke iu referuar disa postimeve në Facebook, të disa qytetarëve që nuk e kanë përkrahur kryetarin e LDK-së Isa Mustafa, ka thënë se VV nuk e ka për qëllim unitetin.
“Sot ishim dëshmitarë të një organizimi e orkestrimi të një ushtrie “virtuale” kundër LDK-së dhe Kryetarit Mustafa, me një orientim të dalluar; në secilën deklaratë, koment e postim është vërejtur gjuhë e urrejtjes, ‘urime për vdekje’, thirrje për linçime etj, që tregon, se partnerët tanë politikë, nuk e kanë për qëllim unitetin, por në fakt vetëm keqpërdorimin e gjendjes së jashtëzakonshme. Kryeministri Kurti, bën mirë të na tregoj nëse është pjesë e këtij organizimi? Nëse jo, pse nuk ndërmerr masa ndaj atyre që keqpërdorin emrin e tij?”, ka shkruar ai.
