3 perditesime
19:02

U caktohen nga 48 orë paraburgim gjashtë anëtarëve të PSD-së

Prokuroria ua ka caktuar masën e paraburgimit gjashtë anëtarëve të Partisë Socialdemokrate, të cilët u arrestuan sot gjatë protestës ndaj kryetares së Gjykatës Speciale, Ekaterina Trëndafilova.

PSD-ja në një postim në Facebook ka shkruar se ajo u izolua që Trendafilovës t’i bëhet vizita sa më normale, duke theksuar se lufta e saj për imazh, është e humbur.

“Prokuroria ka vendosur që kryetarit të PSD-së, Dardan Molliqaj, Zgjim Hysenit, Nol Nushit, Agron Kabashit, Korab Korçës dhe Gent Brahimit t'iu jepet masa e ndalimit për 48 orë. Për ne ky vendim është politik dhe i padrejtë. Kështu po provohet ta ndalin zërin opozitar, ta relativizojnë padrejtësinë e Gjykatës Speciale”, thuhet në postim.

14:38

Molliqaj dhe pesë aktivistë të PSD-së arrestohen në protestën kundër Trendafilovas

Kryetari i Partisë Socialdemokrate, Dardan Molliqaj, të mërkurën është arrestuar nga Policia e Kosovës në protestën kundër kryetares së Gjykatës Speciale, Ekaterina Trendafilova. 

Përveç Molliqajt, Policia ka arrestuar edhe aktivistët e kësaj partie, Nol Nushi, Zgjim Hyseni, Korab Korqa, Agron Kabashi dhe Gent Brahimi.

Forca të shumta policore kanë "blinduar" ambientin ku po mbahet konferenca e Trendafilovas me shoqërinë civile. 

Gjatë protestës, është hedhur edhe gaz lotsjellës nga aktivistët e PSD-së brenda ambientit ku planifikohej të mbahej takimi.


PSD: Kërkojmë urgjentisht të lirohen aktivistët tanë

Partia Socialdemokrate ka reaguar pas arrestimit të kryetarit të saj, Dardan Molliqaj dhe pesë aktivistëve të tjerë, Zgjim Hyseni, Nol Nushi, Korab Korça, Agron Kabashi dhe Gent Ibrahimi, në aksionin e së mërkurës në kundërshtim të Gjykatës Speciale.

Në reagimin e PSD-së thuhet se kërkohet urgjentisht të lirohen aktivistët e saj.

"Metodat frikësuese neve nuk na ndalin. Gjykata është raciste, e padrejtë dhe segreguese. Rezictenca vazhdon. Z. Trendafilova nuk është e mirëseardhur", thuhet në reagimin e kësaj partie.

 

14:25

PSD-ja e pret me protestë Trendafilovan, hidhet gaz lotsjellës

Partia Socialdemokrate e ka pritur me protestë kryetaren e Gjykatës Speciale, Ekaterina Trendafilova, gjatë vizitës së saj në Kosovë të mërkurën.

Aktivistët e PSD-së janë mbledhur përpara vendit ku Trendafilova do të mbajë konferencë me shoqërinë civile.

“TrendafilOUT”, “UÇK-ja nuk mund të gjykohet”, “Historia është shkruar, propaganda ka dështuar”, janë disa nga pankartat e mbajtura nga aktivistët e PSD-së.

Është hedhur gaz lotsjellës brenda ambientit ku Trendafilova do ta mbajë konferencën. Po ashtu, edhe në ambientet e jashtme. 

08:49

Trendafilova sot në Kosovë, PSD-ja e pret me protestë

Kryetarja e Dhomave të Specializuara të Kosovës, gjykatësja Ekaterina Trendafilova, do të jetë për vizitë të mërkurën në Kosovë.

Trendafilova nga ora 14:30 pritet të mbajë një konferencë me përfaqësues të shoqërisë civile.

E pikërisht në orën kur pritet të nisë konferenca e Trendafilovas me përfaqësuesit e shoqërisë civile, Partia Socialdemokrate ka paralajmëruar protestë kundër vizitës së saj në Kosovë.

Edhe në vizitën e paralajmëruar më herët në Kosovë të Trendafilovas, e cila u anulua, PSD-ja planifikoi të organizonte protestë.