Parlamenti Evropian do të diskutojë për zhvillimet e fundit në veri të Kosovës në seancën e ardhshme që do të mbahet në Strasburg.
Nga ky institucion është bërë e ditur se eurodeputetët do të diskutojnë të martën për marrëdhëniet midis Prishtinës dhe Beogradit me Komisionin dhe Këshillin, pas situatës së krijuar së fundmi në veri.
Në njoftimin e PE-së thuhet se Përfaqësuesi i Lartë i Bashkimit Evropian për Politikë të Jashtme dhe Siguri, Joseph Borrell, ka dënuar ashpër sulmin e grupit të armatosur ndaj Policisë së Kosovës.
Gjithashtu theksohet se në dy raporte të veçanta në maj, deputetët i kanë bërë thirrje Kosovës dhe Serbisë që të angazhohen në dialogun e lehtësuar nga Bashkimit Evropian dhe të sigurojnë pa vonesë një marrëveshje gjithëpërfshirëse ligjërisht të detyrueshme për normalizimin e marrëdhënieve bazuar në parimin e njohjes reciproke.
© KOHA. Të gjitha të drejtat janë të rezervuara.
