Blegzim Kamberi, nga Instituti “Musine Kokalari”, ka thënë se më e pakta që do të duhet të bënte bashkësia ndërkombëtare pas sulmit ndaj Policisë së Kosovës në veri është që t’i vendosë masa shtetit të Serbisë.
Sipas tij sjellja e Perëndimit, nuk mund të mos jetë ndryshe me pushtetin e presidentit të Serbisë Aleksandar Vuçiqi pas sulmit në veri.
“Në rastin me të mirë e me të lehtë do të duheshin të mendoheshin që t’i vendosnin masa shtetit të Serbisë”, është shprehur Kamberi të hënën në një intervistë në emisionin “Interaktiv”, në KTV.
Ai ka theksuar se nuk beson që qarqet ndërkombëtare nuk kanë pasur informata për grupet që organizuan sulmin.
“Nuk besoj që qarqet perëndimore nuk kanë pasur informata për këto grupe, edhe nuk besoj që nuk kanë pasur informata që ne veri po organizohen grupe të caktuara e edhe po armatosen, besoj që tash është realitet i ri dhe kur të faktohet edhe në opinionin publik edhe në atë mediatik kësisoj, atëherë kjo normalisht merr edhe një presion më të madhe dhe për diplomacinë dhe tashmë qarqet perëndimore e kanë të vështirë të mos reagojnë”, ka deklaruar Kamberi.
Ai ka theksuar se beson që presioni i ndërkombëtarëve për zbatim të marrëveshjeve të arritura në dialog do të dinamizohet.
Kamberi: Sulmi ndaj Policisë së Kosovës goditje për Vuçiqin
Ai ka thënë se sulmi ndaj Policisë së Kosovës është një goditje e drejtpërdrejtë për pushtetin dhe politikën e presidentit të Serbisë, Aleksandar Vuçiq.
“Vuçiqi ka marr një goditje të jashtëzakonshme politike, sepse në njërën anë nëse ka pasur diçka që e ka karakterizuar politikën e tij, me rajonin dhe posaçërisht me Kosovës, ka qenë që ai e ka ndërtuar një imazh të një politikani që e mban stabilitetin dhe në anën tjetër që angazhohet për integrimin e serbëve në institucionet e Kosovës që nga krijimi i Listës Serbe në vitin 2013 që do të shërbente si strukturë për integrimin e serbeve”, ka theksuar Kamberi.
Ai ka thënë se mendon që presioni ndërkombëtar ndaj Vuçiqit do të rritet.
“Kur ndodhin situata të tilla, hapësira manovruese fillon ngushtohet, edhe mendoj që presioni do të rritet ndaj tij për të marr pozicion të qartë edhe me zotëri Milan Radojiçiq, edhe se cila është pozita e tij në raport me serbët e Kosovës”, është shprehur Kamberi.
Sipas tij sulmet që dje ndodhën ndaj Policisë së Kosovës, nuk ka qenë gjë e papritur, marrë parasysh tensionet në veri dhe paralajmërimet ndërkombëtare që situatë e sigurisë atje është e tensionuar.
“Ky grup nuk është organizuar brenda ditës, kjo ka qenë vazhdimësi e një organizimi nga njerëz profesionistë dhe nuk ka asgjë të fshehtë aty se ky grup ka pasur ndërlidhje me struktura nga Serbia, është vështirë për ta ditur se me cilat struktura në hierarki, por që kanë pasur ndërlidhje me strukturat shtetërore ajo është e qartë, shihet nga profesionalizmi i tyre, edhe për nga armatimi e edhe për nga organizimi”, është shprehur Kamberi.
© KOHA. Të gjitha të drejtat janë të rezervuara.
