Ish-ministrja e Punëve të Jashtme, Meliza Haradinaj, ka thënë se Qeveria e Kosovës ka gabuar në hapa sa i përket dialogut me Serbinë. Sipas saj, nga dialogimi për njohje në qendër, sot po dialogohet për Asociacion të komunave me shumicë serbe në qendër.
Të enjten në “Interaktiv” të KTV-së, Haradinaj ka thënë se Kosova ka gabuar në hapa dhe e ka sjellë situatën që të duket dhe të keqpërdoret nga Serbia si e tillë që Kosova kinse po ua cenon të drejtat serbëve të veriut, gjë që sipas saj, nuk është e vërtetë.
“Kosova asnjëherë më parë nuk ka qenë në situatë gjeopolitike më të vështirë për shkak të rrethanave të reja që janë shkaktuar me zhvillimet e fundit në veri të Kosovës. Gabimi në hapa që çoi në situatë ku Kosova nga dialogimi për njohje në qendër, tani kemi dialogim për Asociacion në qendër. Serbia është në dialog vetëm për Asociacionin, Kosova do të duhej të insistojë që të definohen pikat kufitare”, ka thënë ajo.
“Për SHBA-në më e rrezikshme është një mini-Rusi në Ballkan sesa një Asociacion në Kosovë”
Ish-kryediplomatja e Kosovës ka thënë se nga intervista e të dërguarit special të SHBA-së për Ballkanin Perëndimor, Gabriel Escobar, kuptohet se situata e vlerësimit të sigurisë ka ndryshuar dhe se për SHBA-në më e rrezikshme është një mini-Rusi në Ballkan sesa një Asociacion brenda Kosovës.
Sipas Haradinajt, partitë opozitare ia kanë borxh qeverisë aktuale unitetin në këtë situatë gjeopolitike.
“Partitë opozitare ia kanë pasur borxh kësaj qeverie unitetin dhe të bëhen bashkë në këtë situatë kaq të vështirë gjeopolitike që gjendemi sot. Por, mos ta amnistojmë edhe kryeministrin si institucion që do të duhej t’ia zgjaste dorën opozitës. Të dyja anët kanë një lloj papërgjegjësie rreth mungesës së unitetit përballë situatës që gjendemi sot”, është shprehur ajo.
© KOHA. Të gjitha të drejtat janë të rezervuara.
