Jakaj: Cili është kuptimi i Qeverisë nëse projektligjet shkruhen me të meta kushtetuese
Naim Jakaj, hulumtues në Institutin e Kosovës për Drejtësi, ka konsideruar se një sërë projektligjesh të dërguara në Kuvend nga Qeveria e Kosovës, janë të shkruara me të meta kushtetuese dhe shkelin standardet ndërkombëtare.
Të enjten në emisionin “60 Minuta” në KTV, Jakaj ka thënë se rreth 7 për qind e propozimeve legjislative të dërguara nga Qeveria në Kuvend, janë dërguar në Gjykatën Kushtetuese.
“Nëse shohim një kallaballëk të neneve të caktuara që janë me rëndësi në Kushtetutë por parimet themelore të funksionimit që janë vendosur nga propozimi i ish-presidentit Marti Ahtisaari në Kushtetutën e Kosovës, ato janë cenuar në mënyrë të rëndë. Janë edhe disa projektligje të tjera siç është ai për pagën në sektorin publik nga avokati i popullit, tatimi në pronë, paga minimale, janë një sërë projektligje që në total përbëjnë 6-7 për qind të të gjitha propozimeve legjislative që i ka dërguar Qeveria e Kosovës. Cili është kuptimi i Qeverisë nëse projektligjet e dërguara shkruhen me të meta kushtetuese dhe me shkelje të standardeve ndërkombëtare”, ka thënë ai.
Jakaj më tej ka thënë se polemikat dhe inatet duhet të tejkalohen në mënyrë që disa ligje me rëndësi jetike, si ai për Kodin Civil, të kalojnë.
Ai ka konsideruar se edhe Projektligji për fertilizimin e asistuar mjekësor nuk do të kalojë.
“Kemi pasur një pjesë të deputetëve të Vetëvendosjes që kanë thënë se nuk do ta votojnë dhe nuk presim që do të kalojë shumë shpejt për shkak të atyre dhe për shkak të mospjesëmarrjes së opozitës”, është shprehur ai.
