Përfaqësues të organizatave të shoqërisë civile nga komunat në veri të Kosovës, në debatin me temën “Situata në veri të Kosovës pas zgjedhjeve lokale – sfidat dhe zgjidhjet”, kanë diskutuar për situatën e krijuar në veri.
Disa nga ta kanë thënë se përgjegjëse për situatën janë strukturat paralele të komanduara nga Serbia e disa kanë kërkuar që Njësia Speciale e Policisë së Kosovës të tërhiqet nga objektet komunale.
Nenad Radosavljeviq nga Iniciativa Qytetare "Narodna Pravda" në Leposaviq. Ka thënë se problemet në veri janë pasojë e regjimit të presidentit të Serbisë, Aleksandar Vuçiqi, i cili sipas tij, përmes strukturave paralele nuk lejoi qytetarët që të dalin në zgjedhje.
“Ky fillimi i problemit pas të cilit u lidh edhe Kurti që insistoi me çdo kusht t’i vendos kryetarët. Propozimi im ka qenë që të krijohen organet të përkohshme që do të vendoseshin nga komunitetet e ndryshme, deri në zgjedhjet e ardhshme. Sikur të kishte pasur vullnet të mirë, Kurti nuk do të insistonte që të vendosen kryetarët, që pastaj pati protesta. Atje protestojnë strukturat e pushtetit që janë fajtorë për gjithçka dhe tani me çdo kusht kërkojnë të kthehen në ato kolltuqe. Shumë ashpër janë të interesuar që të mos mbesin pa paga. Përveç tyre, ka njerëz që kanë vuajtur dhe po protestojnë me sinqeritet pa qenë të vetëdijshëm se ata janë vënë në rrezik nga këto struktura. Më vjen keq që ata njerëz janë në vështirësi dhe që janë diskredituar nga manipulimi i pushtetit”, ka deklaruar Radosavljeviq.
Sipas tij ku është një minus shumë i madh për strukturat në pushtet që e nisën gjithë këtë, pavarësisht se ka relaksim të marrëdhënieve mes KFOR-it dhe qytetarëve.
Ndërsa aktivist i shoqërisë civile nga Zveçani, Dejan Nedeljkoviq, ka thënë se shpresojnë që Njësia Speciale e Policisë së Kosovës të tërhiqet nga objektet komunale.
Sipas tij “pasi janë uzurpuar komunat nga Policia e Kosovës, po vazhdojnë protestat por sipas tij, me kalimin e kohës po ka më pak protestues.
“Në vitin 2015 kur janë integruar ka qenë propozim të bëhen objekte ndihmës, por nuk ka dashur Lista Serbe pasi kanë menduar se do të mbeten përgjithmonë në pushtet. Sikur të vinin kryetarët shqiptarë në ato objekte të reja, komuna paralele do të mbetej. Tani ka improvizin para barrikadave ku njerëzit vijnë e nënshkruhen se kanë ardhur në punë. Marrëdhëniet janë relaksuar paska mes qytetarëve e KFOR-it. Shpresojmë që njësia speciale të tërhiqet nga komuna dhe të kemi një zgjidhje”, ka theksuar Nedeljokoviq.
Milija Bisavaq nga Iniciativa Qytetare për Zubin-Potokun ka deklaruar se është dashur të reagohet më herët që të mos vijmë në këtë situatë.
“Unë kam qenë në protesta, ka pasur që kanë shkuar në miting në Beograd e të atillë që nuk kanë dashur të protestojnë. Tek ne nuk ka pasur incidente të mëdha, por në ditën e parë Policia kanë hedhur shok bomba e gaz lotsjellës, kanë hyrë me dhunë. Kanë mundur të vijnë në mënyrë të qetë që të mos vinim te kjo situatë. Futja e dhunshme nuk qon askund. Qytetarët të hutuar, fëmijët nuk po shkojnë në shkollë e gjendja e jetesës është vështirësuar pasi objekti është bllokuar dhe qytetarët nuk po mund të marrin shërbime”, ka theksuar Bisavaq.
Sipas saj Qeveria e Kosovës duhet të bisedojë me ta dhe jo vetëm me Listën Serbe, pasi siç ka thënë ajo, nuk është vetëm Lista Serbe që i përfaqëson interesat e serbëve.
Miodrag Miliçeviq, nga OJQ Aktiv ka thënë se problemi nuk është si do të funksionojnë komunat, por se si situata të qetësohet dhe të kthehet në terren politik.
Gjendjes së krijuar sipas tij nuk i parapriu vetëm dalja e serbëve nga institucionet.
“Ky problem është dashur të zgjidhet në Ohër kur u arrit marrëveshja. Këta që janë zgjedhur nuk kanë legjitimitet dhe as komunikim me komunitetin shumicë serb, edhe pse zgjedhja e tyre është e ligjshme”, ka deklaruar Miliçeviq.
Sipas tij Beogradi është shumë më bashkëpunues se Qeveria e Kosovës, e për këtë ka thënë se motiv është integrimi në BE. Sipas tij Kurti nuk dëgjon shqetësimet e qytetarëve në veri.
“Është e nevojshme që të tërhiqet Njësia Speciale e cila vitet e fundit ka krijuar probleme të mëdha, përfshirë në raport me mua. Është pastaj krijimi i Asociacionit dhe është e nevojshme nisja e dialogut për këtë çështje. Bashkësia ndërkombëtare ishte e qartë dhe Escobari tha se Asociacioni do të ndërtohet me ose pa këtë qeveri. Kjo është kërkesa e dytë legjitime që duhet marrë parasysh. Edhe procesi zgjedhor duhet të ndodhë, por për këtë moment konsiderojmë se propozimi i Bujar Osmanit është modeli më i duhur ku OSBE do të merrte përsipër organizimin e zgjedhjeve në veri”, është shprehur Miliçeviq.
© KOHA. Të gjitha të drejtat janë të rezervuara.
