Mbahet fshehtë performanca e drejtorëve të ndërmarrjeve publike
Foto: Driton Paçarada / KOHA
Njësia për Politika dhe Monitorim të Ndërmarrjeve Publike obligohet me ligj që të përpilojë vlerësime për drejtorët e secilës ndërmarrje dhe t’i publikojë ato në uebfaqe. Por, dokumentet mungojnë. Në Njësinë që vepron në kuadër të Ministrisë së Ekonomisë, nuk e arsyetuan mungesën e raporteve. E njohës të ekonomisë vlerësuan se kjo mungesë e të dhënave është indikatore e politizimit dhe keqmenaxhimit të ndërmarrjeve ndër vite
Qytetarëve u mbahet fshehtë efektshmëria e drejtorëve të ndërmarrjeve publike, qendrore e rajonale.
Ndonëse Ligji për këto ndërmarrje kërkon nga Njësia për Politika dhe Monitorim që të përpilojë vlerësime dhe t’i publikojë ato në uebfaqe, dokumentet për performancën e drejtorëve mungojnë.
Në Njësinë që vepron në kuadër të Ministrisë së Ekonomisë nuk e arsyetuan mungesën e këtyre dokumenteve.
E njohësi i ekonomisë, Safet Gërxhaliu, vlerëson se kjo mungesë e të dhënave është indikatore e politizimit dhe keqmenaxhimit të ndërmarrjeve ndër vite.
“Ndërmarrjet publike sot janë shumë më tepër barrë e shtetit sesa kontribuojnë në shtet dhe për shtet. E kanë pasur një të kaluar mjaft të zymtë, ku ka munguar transparenca, ka munguar llogaridhënia, kanë qenë të politizuara, kanë qenë të kriminalizuara dhe e tëra kjo e ka dëmtuar ekonominë e Kosovës, dëmtim të cilin po e paguajmë sot e do ta paguajnë edhe gjeneratat në të ardhmen”, ka thënë Gërxhaliu. “Në këtë drejtim, reflektimi i parë i keqpërdorimeve dhe i politizimit është mungesa e të dhënave dhe transparencës”.
E hulumtuesi i Institutit GAP, Besart Zhuja, thotë se mungojnë edhe shumë dokumente për hartimin e të cilave obligohen vetë ndërmarrjet publike. Ai shtron nevojën për më shumë transparencë.
“Përveç detyrimit ligjor që e ka ndaj qytetarëve për të publikuar raporte, për të qenë më transparent me publikun, ato i detyrohen edhe aksionarit, pra Qeverisë që këto raporte t’i publikojnë dhe t’i dorëzojnë, në mënyrë që aksionari, në këtë rast Qeveria, të bëjë monitorimin dhe vlerësimin e punës dhe performancës. Ligji i obligon që këto raporte t’i dorëzohen Njësisë, e cila e bën monitorimin konstant të ecurisë së punës së ndërmarrjeve publike”, ka thënë Zhuja.
Deri javën e shkuar, në faqen e Njësisë për Politika dhe Monitorim të Ndërmarrjeve Publike kanë munguar edhe disa nga raportet vjetore financiare, planet biznesore, raportet e kënaqshmërisë. Por, ato janë publikuar në uebfaqe, tek pasi KOHA ka pyetur për mungesën e tyre.
