Asnjë shkollë nga 17 të vlerësuara s’pati performancë të shkëlqyeshme
Asnjë nga shtatëmbëdhjetë shkollat e vlerësuara nga Inspektorati i Arsimit, gjatë një viti, nuk ka treguar perfomancë të shkëlqyeshme. Sipas të dhënave të Inspektoratit, 12 kanë treguar performancë të pranueshme, e pesë janë vlerësuar me paraqitje të mirë. Ky proces, i cili nuk ka arritur të zhvillohet në mënyrë masive për shkak të mungesës së inspektorëve, është vlerësuar i rëndësishëm për ngritjen e performancës në shkolla. E në Këshillin e Prindërve janë ankuar se niveli qendror me atë lokal kanë mungesë koordinimi për të zhvilluar këtë proces
Vetëm 17 institucione të arsimit parauniversitar janë vlerësuar nga Inspektorati i Arsimit, që kur ky proces rifilloi vitin e shkuar.
Procesi për vlerësimin e shkollave nisi më 2017, por procedurat kanë arritur të zhvillohen vetëm sa i përket fazës së vlerësimit të brendshëm që bëhet nga menaxhmenti i shkollave. Për shkak të pandemisë, procesi në vitin 2020 stagnoi.
“Që nga fillimi i vitit shkollor 2021/2022 e deri në muajin prill të vitit 2022 Inspektorati i Arsimit ka organizuar takime dhe punëtori të ndryshme në të cilat në fokus kanë qenë analiza e gjendjes në terren dhe shqyrtimi i mundësisë për rifillimin e procesit të vlerësimit të jashtëm të performancës së shkollës (VJPSh). Në muajin maj 2022, Inspektorati i Arsimit ka rifilluar procesin e vlerësimit të jashtëm të performancës së shkollës (VJPSh)”, thuhet në përgjigjen e Inspektoratit të Arsimit.
Nga 17 institucionet që janë vlerësuar që nga viti 2022, 12 kanë treguar performancë të pranueshme e pesë janë vlerësuar me paraqitje të mirë. Pra, asnjë me paraqitje të shkëlqyeshme.
Udhëheqës të shkollës fillore “Asim Vokshi” në Prishtinë, e cila së fundi i është nënshtruar vlerësimit të jashtëm nga Inspektorati, e kanë kualifikuar procesin si të rëndësishëm për ngritjen e performancës së tyre.
“Vlerësimi që bëhet nga jashtë është i rëndësishëm për arsye se ne kemi vlerësimin e brendshëm që e kemi bërë, por tash po na intereson vlerësimi i jashtëm që e bën Ministria se a përputhet me këtë vlerësim që e kemi bërë të brendshëm dhe a kemi ngritje të performancës në këto fusha apo kemi rënie”, ka thënë drejtori Nazif Jashari.
Në nivel vendi janë mbi 1 mijë institucione të arsimit parauniversitar që sipas Udhëzimit Administrativ të miratuar në vitin 2017 duhet të vlerësohen nga Inspektorati i Arsimit, me qëllim që të paraqitet një pasqyrë e qartë e gjendjes në shkolla. Numri i vogël i inspektorëve është përmendur si arsye nga Inspektorati për moszhvillimin e procesit në të gjitha shkollat. Në nivel vendi janë 30 inspektorë.
“Në periudhën njëvjeçare (maj 2022 – prill 2023), edhe pse me numër të pamjaftueshëm të inspektorëve të arsimit, janë vlerësuar gjithsej 17 shkolla në nivel të Kosovës. Për shkak se ky ka qenë viti i parë i vlerësimit pas pandemisë COVID-19, të gjitha shkollat janë vlerësuar në të gjitha (5) fushat e cilësisë”, është theksuar në përgjigjen e Inspektoratit,
E në shkollën “Emin Duraku” në Prishtinë kanë thënë se një lloj vlerësimi ka bërë Drejtoria Komunale e Arsimit.
“Tash kemi qenë në proces të auditimit nga Komuna e Prishtinës, një auditim i jashtëm, çdo gjë që është kërkuar e kemi dorëzuar me kohë, me dokumente siç kërkohet dhe besoj se edhe aty do të kemi vlerësim pozitiv”, ka thënë drejtori Visar Osmani. “Sa i përket vlerësimit të jashtëm nga Ministria e Arsimit, apo nga ndonjë organizatë relevante ne jemi të hapur, është i mirëseardhur, sepse thjesht ideja është që të mos marrim vërejtje, por të marrim këshilla që ta përmirësojmë dhe të ecim tutje”.
Në Këshillin e Prindërve të Kosovës kanë thënë se në këtë proces është duke u vërejtur moskoordinimi i nivelit qendror me atë lokal. Sipas kryetarit të Këshillit, Jeton Demi, kjo situatë krijon shpenzime dhe nuk sjell dobi.
“Njëri po bëhet nga Drejtoria Komunale e Arsimit e tjetri nga Ministria e Arsimit, gjegjësisht Inspektorati i Arsimit. Këto dyfishime (të panevojshme) procesesh dyshoj se mund të kenë efekt pozitiv, përkundrazi. Duhet të ketë një bashkëpunim e bashkërendim të institucioneve që një vlerësim i tillë të bëhet ose i përbashkët ose i dakorduar vetëm nga njëra palë (ta zëmë DKA) dhe Inspektorati të merret me mbikëqyrje të procesit dhe gjetjeve eventuale”, ka thënë Demi.
Sipas legjislacionit, detyrat e përgjegjësitë e drejtorive komunale të Arsimit janë të sigurojnë pajisjet për të gjitha shkollat për të realizuar vetëvlerësimin dhe të bashkëpunojnë me Inspektoratin në përzgjedhjen e institucioneve arsimore që do të jenë pjesë e vlerësimit të jashtëm. Ndërkaq Ministria duhet të mbikëqyrë cilësinë e funksionimit të vlerësimit që zhvillohet nga Inspektorati i Arsimit dhe të ndërmarrë masa urgjente për përmirësimin e gjendjes në shkolla në bazë të rekomandimeve të nxjerra nga raportet e inspektorëve.
