Beteja e brendshme politike në Serbi mund të ndikojë në procesin e dialogut
Zgjedhje të parakohshme parlamentare e riformatim të Qeverisë ka paralajmëruar për në shtator presidenti i Serbisë, Aleksandar Vuçiq. Këto zgjedhje analistët në Kosovë i kanë interpretuar si synim të Vuçiqit për forcimin e strukturës politike. E për ndikimin e tyre në rrjedhën e dialogut Kosovë-Serbi ata kanë shprehur qëndrime ndryshme
Presidenti i Serbisë, Aleksandar Vuçiq, i është kundërpërgjigjur opozitës në këtë vend, duke thënë se më së largu në shtator do të ketë zgjedhje të reja parlamentare. Ai ka thënë se këtë plan do të zbulojë në mitingun e 26 majit, që e ka thirrur si kundërpërgjigje për protestat që ditëve të fundit ka organizuar opozita, e ku është kërkuar dorëheqja e tij.
“Epo, po ju them se nuk do të mund të bëni gjë me dhunë. E sa i përket demokracisë, jam i gatshëm të dal në përballje. S’ka problem, do ta informoj popullin më 26 maj.... do të shkojmë në zgjedhje. Zgjedhje do të ketë më së largu në shtator, dhe s’ka filozofi këtu, zgjedhje në shtator”, ka thënë Vuçiq të dielën, gjatë qëndrimit në Smederevë.
E këto zgjedhje, analistët politikë në Kosovë i interpretuan si synim të Vuçiqit për ta forcuar strukturën e tij politike me qëllim të legjitimit të pushtetit, por edhe për të zvarritur procesin e dialogut.
Drejtori i institutit “Epik”, Demush Shasha, shpreh bindjen që synimi i Vuçiqit me zgjedhjet e reja, krahas forcimit të strukturës udhëheqëse, është edhe zvarritja e dialogut.
“Nga një kënd, shoh një incentivë që z. Vuçiq të shtyjë përpara zgjedhjet e jashtëzakonshme. Pse? Sepse zgjedhjet e jashtëzakonshme do t’i ofronin atij alibi për, le të themi, pezullimin e procesit të dialogut dhe rrjedhimisht pezullim i çfarëdo kompromisi që do të kërkonte komuniteti perëndimor nga z. Vuçiq. Por për të njëjtën arsye unë besoj që komuniteti perëndimor do të jetë kundër dhe do të insistojë të mos ketë zgjedhje, pasi Serbia sapo i përfundoi në shkurt edhe zgjedhjet presidenciale, edhe parlamentare”, ka thënë Shasha.
E Zharko Koraq, ish-nënkryetar i Qeverisë serbe në kabinetin e Zoran Gjingjiqit, tha për mediat serbe se Vuçiqi nuk synon që ta zbatojë Marrëveshjen e Ohrit, pasi e di që për çdo zgjidhje mbi çështjen e Kosovës do të dalë i humbur para votuesve.
“Vuçiq nuk ka ndërmend të zbatojë Marrëveshjen e Ohrit, për të çdo zgjidhje për çështjen e Kosovës humbet në sytë e votuesve të tij. Dhe ai mendon vetëm për votuesit e tij. Vuçiq mban të ashtuquajturat fokus grupe dy herë në ditë, kjo është unike. Nuk kam dëgjuar që dikush ta bëjë këtë, ai si në mëngjes ashtu edhe në pasdite i shqyrton besnikët e tij politikë dhe e di se do të humbasë me çdo zgjidhje të çështjes së Kosovës”, ka thënë Koraq.
Mirëpo ndryshe mendon analisti i çështjeve politike, Artan Muhaxhiqi. Ai thotë se Vuçiqi nuk ka si të ndikojë në rrjedhën e dialogut.
“Dinamika e dialogut vendoset nga Shtetet e Bashkuara dhe nga BE-ja dhe nuk mendoj që ekziston ndonjë lider politik, qoftë në Kosovë apo në Serbi, që mund ta imponojë agjendën në mënyrë fondamentale. Prandaj nuk pritet ndonjë ndryshim i madh në ecuri... Ai e ka edhe personale, sepse është e pritshme pra që ai do t’i paralajmërojë edhe qytetarët serbë se do të bëjë kompromise. Prandaj, edhe me fitoren e tij në zgjedhje ai do ta ketë një adut të fortë para të gjithëve, që i ka paralajmëruar qytetarët dhe e ka marrë vullnetin e tyre, për kompromiset që do të duhet t’i bëjë në etapën e fundi të dialogut”, ka thënë Muhaxhiri.
Në Serbi, edhe për të premten e kësaj javë është paralajmëruar protestë nga një pjesë e partive opozitare. Protestat nisën pas sulmit në një shkollë në Serbi, ku një 13-vjeçar vrau tetë nxënës dhe një roje të shkollës. Parullë e protestave të opozitës është “Serbia kundër dhunës”, por për të ndalur këtë, ata e kanë vlerësuar se pengesë janë Vuçiqi dhe disa vartës të tij në institucione. Për këtë e kanë kërkuar edhe dorëheqjet e tyre.
