Kryeministri Albin Kurti ka premtuar përkrahje për komunitetin turk që jeton në Kosovë.
Në diskutimin e organizuar me rastin e Ditës kombëtare të turqve në Kosovë, Kurti ka thënë se e dinë që ky komunitet ka nevojë për mbështetjen e Qeverisë.
“Megjithëkëtë, ne e dimë se komuniteti ka nevojë për mbështetjen e Qeverisë, andaj më vjen mirë që në javën e kaluar e kemi paralajmëruar një pako shtesë prej 3 milionë eurove për komunitetet joshumicë në Kosovë. Kjo pako përmban masa mbështetëse për vende të reja pune për bizneset ekzistuese dhe ato të reja, për fermerët dhe prodhuesit e vegjël në zonat rurale dhe për shoqërinë civile, që kontribuon në integrimin dhe afirmimin e komuniteteve joshumicë”, është shprehur Kurti.
Kurti ka përmendur që muajin e kaluar në shkollën “Elena Gjika” në Prishtinë kanë festuar 72-vjetorin e mësimit në gjuhën turke, duke thënë se janë të lumtur për këtë traditë të gjatë të shumëgjuhësisë në Kosovë.
“Strategjia jonë e arsimit për vitet 2022-2026 përfshin subvencionet e vazhdueshme për hartimin, rishikimin, përkthimin dhe përshtatjen e teksteve e materialeve e mësimore në gjuhën turke. Po ashtu, planifikojmë të organizojmë aktivitete për mësimin e gjuhës shqipe për komunitetet që kanë gjuhë të tjera, si turqishten për shembull gjuhë amtare”, ka deklaruar Kurti.
Ai ka theksuar se komuniteti turk është pjesë integrale e mozaikut tonë të pasur shoqëror dhe kulturor.
© KOHA. Të gjitha të drejtat janë të rezervuara.
