Në Shqipëri nis sot (e premte) zyrtarisht fushata elektorale për zgjedhjet lokale që do të mbahen më 14 maj. Rreth 140 kandidatë do të synojnë të marrin drejtimin e 61 bashkive në tërë Shqipërinë.
Pavarësisht përcaktimeve kohore, sipas vlerësimit të Institut të Studimeve Politika, fushata de facto ka nisur prej kohësh dhe partitë kanë zhvilluar aktivitete promovuese të kandidatëve në bashki të ndryshme prej muajsh.
Gara për 14 majin do të jetë kryesisht mes Partisë Socialiste te Shqipërisë së Edi Ramës dhe Koalicionit “Bashkë fitojmë” të Sali Berishës dhe Ilir Metës të cilët kanë kandidatët e tyre në çdo bashki.
Ndërsa, Partia Demokratike e Shqipërisë, e përfaqësuar nga kryetari Enkeljd Alibeaj, gjithashtu do të jetë në garë në disa bashki.
Në 44 bashki do të garojnë nga dy kandidatë, në 14 bashki do të jenë nga tre kandidatë, ndërsa në Sarandë do të jenë katër kandidatë.
Beteja kryesore do të jetë për kryeqytetin, Tiranën, ku ka gjashtë kandidatë. PS ka vendosur t’i besojë Erion Veliajt, kryetarit aktual, ndërsa koalicioni Meta-Berisha i ka vënë përballë Belind Këlliçin. Ndërsa PD-ja e Alibeajt ka kandiduar Roland Bejkon.
Prezenca e OSBE-së në Tiranë bëri thirrje për fushatë zgjedhore paqësore dhe të hapur, ku konkurrimi politik të jetë sa më konstruktiv.
OSBE apeloi që fushata zgjedhore të bëhet në zbatim të legjislacionit shqiptar, standardeve ndërkombëtare dhe rekomandimeve të OSBE/ODIHR-it.
Presidenti i Shqipërisë, Bajram Begaj deklaroi se një proces zgjedhor i drejtë, i paanshëm dhe i bazuar tërësisht në Kushtetutë e ligj, është detyrim thelbësor ndaj vendit.
Begaj potencoi se organizimi i zgjedhjeve lokale, të drejta, të lira dhe përmbushja e vullnetit të qytetarëve, janë pjesë e pandashme e aspiratës së Shqipërisë evropiane. /KP
