Presidenti serb, Aleksandar Vuçiq, të shtunën tha se me strategjinë e re të mbrojtjes, Qeveria e Kosovës do të nënkuptohej se po do përshkallëzim të konfliktit dhe asgjë tjetër.
Ai iu referua draftit të strategjisë së re të mbrojtjes, sipas të cilit, Forca e Sigurisë së Kosovës synohet që të shtrihen në të gjithë territorin, përfshirë veriun. Këtë Vuçiqi e ka kualifikuar si nxitje për përshkallëzim të konfliktit.
“Ne do të flasim për këtë. Nuk mendoj se do të ndodhë lehtë sepse do të thotë se nuk ka më asnjë efekt ndonjë marrëveshje që kemi arritur. Kjo do të thotë se ata duan një përshkallëzim të konfliktit dhe asgjë tjetër”, ka thënë Vuçiq të shtunën, duke iu përgjigjur një pyetje nëse ky hartim i strategjisë është presion për Serbinë.
Në draftin e strategjisë theksohet se nuk është eliminuar tërësisht kërcënimi i drejtpërdrejtë ushtarak ndaj Kosovës nga Serbia, por vlerësohet se kjo mundësi është zvogëluar pas proceseve integruese të vendeve të rajonit në NATO dhe në BE. Në këtë drejtim, sipas këtij dokumenti, thelbësore mbetet prania e NATO-s dhe BE-së në Kosovë, si dhe zhvillimi i kapaciteteve të Kosovës në fushën e sigurisë dhe të mbrojtjes.
© KOHA. Të gjitha të drejtat janë të rezervuara.
