Krasniqi: Marrëveshja e Ohrit rezultat i gabimeve të vazhdueshme të Kurtit
Kryetari i Partisë Demokratike të Kosovës, Memli Krasniqi, ka thënë se Marrëveshja bazë për normalizimin e marrëdhënieve Kosovë – Serbi nuk është as finale e as gjithëpërfshirëse. Krasniqi ka thënë se me këtë marrëveshja Kosova heq dorë nga njohja e ndërsjellë. Ka thënë se marrëveshja e dakorduar nuk është e mjaftueshme dhe është mundësi e humbur për të përmbyllur konfliktin e ngrirë me Serbinë.
Krasniqi i bëri këto komente pas takimit me Ambasadorin e Finlandës në Kosovë, Matti Nissinen, i cili ishte i shoqëruar nga Jeeni Laakso nga Ministria e Punëve të Jashtme të Finlandës dhe Annina Peltonen nga Fondacioni për Paqe “Marti Ahtisaari” (CMI).
“Bashkë diskutuam për zhvillimet e fundit në Kosovë dhe situatën aktuale politike, pas pranimit të propozimit evropian nga kryeministri Kurti në Bruksel dhe dakordimit për aneksin e zbatimit të tij në Ohër. Për ne, kjo marrëveshje, e cila nuk është as finale e as gjithëpërfshirëse dhe që heq dorë nga njohja e ndërsjellë, është e pamjaftueshme dhe mundësi e humbur për të përmbyllur konfliktin e ngrirë prej dekadash me Serbinë. Kjo marrëveshje, mbi të gjitha, është rezultat i gabimeve të vazhdueshme të kryeministrit Kurti dhe nuk i arrin qëllimet tona shtetërore e qytetare. Mysafirët i falënderova për vizitën dhe mbështetjen konstante që Finlanda ka dhënë për Republikën e Kosovës”, ka shkruar Krasniqi në Facebook.
