Opozita thotë se Kurti do ta nënshkruajë Asociacionin dhe se marrëveshja s’e ka njohjen në qendër
Dy partitë më të mëdha opozitare në vend, PDK-ja e LDK-ja, kanë akuzuar kryeministrin Kurti se me marrëveshjen që pritet të nënshkruhet në Bruksel nuk do të ketë njohje. Ndërkaq në Aleancën për Ardhmërinë e Kosovës kanë kërkuar që Qeveria t’i thotë po përfundimtare propozimit franko-gjerman.
Partitë opozitare kanë vazhduar me kritika për kryeministrin Albin Kurti në prag të takimit të së hënës në Bruksel, ku edhe pritet që nga palët të nënshkruhet pranimi i planit franko-gjerman.
Nënkryetarja e Partisë Demokratike të Kosovës, Vlora Çitaku, përmes një statusi në Facebook ka thënë se ajo për çka po negocion kryeministri Kurti me presidentin Aleksandar Vuçiq nuk e ka njohjen në qendër.
“Shkurt, nesër do të nënshkruhet një marrëveshje përmes së cilës palët zotohen se do të zbatojnë të gjitha marrëveshjet e arritura deri më tani. Një marrëveshje me asociacionin në qendër, e njohjen as në periferi. Një status quo e re. Ky plan nuk ka pikur nga qielli. Ky është produkt i negocimit të kryeministrit”, ka thënë Çitaku.
Në LDK thonë se duhet insistuar në njohje de jure, pasi, sipas tyre, Kosova disa herë është njohur de facto me marrëveshjet e arritura, por kjo s’ka sjellë normalizim marrëdhëniesh.
Nënkryetarja e LDK-së, Shqipe Mjekiqi, ka thënë se ata insistojnë që në çdo marrëveshje që të nënshkruhet duhet ta ketë njohjen në qendër.
“Do të thosha që takimi i nesërm është një prej momenteve më vendimtare për të parë se ku ka lëvizur Qeveria Kurti sa i përket procesit të dialogut. Ju e dini shumë mirë që për Qeverinë Kurti ashtu sic është deklaruar në fillim të mandatit të saj dialogu nuk ka qenë prioritet, dialogu është bërë më pas prioritet për shkak të kushteve e rrethanave të ndryshme. Tani vendimi i nesërm do të jetë me të vërtetë një pikë vendimtare për të parë se çfarë lëvizje nga qëndrimi fillestar po bën Qeveria Kurti duke deklaruar pra në një moment që dialogu nuk është prioritet e që duhet të ketë një njohje të ndërsjellë e që s’mund të ketë një asociacion e të tjera e të tjera, në një marrëveshje që nuk është as marrëveshje përfundimtare e as nuk e ka njohjen e që mund ta ketë si pjesë e saj një asociacion pjesë të saj– çfarëdo që qeveritë pajtohen për asociacion”, ka thënë Mjekiqi.
Për dallim nga PDK-ja e LDK-ja, në AAK thonë se Qeveria nuk duhet të eksperimentojë dhe duhet ta pranojë propozimin franko-gjerman.
“Bashkimi Evropian dhe SHBA-ja tashmë e kanë bërë të qartë qëndrimin e tyre. Palëve u është dhënë propozimin franko-gjerman me vërejtjen se ai nuk mund të ndryshohet, për të cilin pjesa dërrmuese e spektrit politik në Kosovë, duke përfshirë edhe Qeverinë, kanë deklaruar se kjo paraqet njohje faktike të Kosovës. Nuk është mirë të eksperimentohet dhe ne si Aleancë presim nga kryeministri të mos e nxjerrë edhe një herë Kosovën të dështuar në Bruksel, por t'i thotë PO përfundimtare propozimit Franko-Gjerman! Asnjëherë nuk ka pasur momentum më të përshtatshëm për një marrëveshje me Serbinë, që në thelb e ka njohjen. Nëse lëshohet ky rast, pasojat do të jenë katastrofike për Kosovën. Unë pres që kryeministri Kurti nuk do të gabojë këtë herë!”, ka thënë Muharrem Nitaj, sekretar i Përgjithshëm i AAK-së.
Shumë më i ashpër në kritika është shprehur ish-bashkëpartiaku i kryeministrit Kurti, Dardan Molliqaj, i cili ka thënë se plani për të cilin pritet të jepet dakordimi në Bruksel i shkon për shtat vetëm Serbisë.
“Kur të publikohet Plani Franko-Gjerman, bashkë me aneksin e zbatimit, aty do ta shihni që i ka veç dy vlera, të dyja në shërbim të Serbisë. E para, pranimi i kornizës së dialogut që s’ka me u kërku njohja, jo sot po as në të ardhmen, nga Serbia’ dhe e dyta zbatimi i Asociacionit. Çështjet e tjera janë periferike dhe të parëndësishme”, ka thënë Molliqaj.
Gjatë së dielës udhëheqës e diplomatë evropianë e amerikanë i kanë përgëzuar kryeministrin Albin Kurti e presidentin Aleksandar Vuçiq për pranimin e propozimit evropian.
