Një video nga Parlamenti i Serbisë ka shfaqur deputetin e Partisë Socialiste të Serbisë, Zvonko Steviq, duke shikuar filma për të rritur në telefonin e tij, gjatë seancës në të cilën po diskutohej për Kosovën javën e shkuar.

Videoja u shfrytëzua për përplasje politike nga rivalët politikë në Serbi, Partia Përparimtare (SNS) e presidentit serb Aleksandar Vuçiq.

Darko Glishiq nga SNS-ja ka thënë për “TV Happy” se në kohën kur deputetët po talleshin me Vuçiqin, deputeti Steviq po shikonte filma për të rritur.

I pyetur nëse është e mundshme që partia e Vuçiqit të vazhdojë bashkëpunimin me socialistët e Ivica Daçiqit, Glishiq ka thënë se në Parlamentin e Serbisë, në seancën për Kosovën, “të gjithë shfaqën fytyrat e tyre, kush është i prirë nga dhuna dhe kush shikon filma pornografikë”.

Ai s’i ka përjashtuar zgjedhjet e reja. Glishiq ka akuzuar partnerët qeverisës se në seancën për Kosovën kanë marrë për vete meritat. Sipas tij, Partia e Daçiqit, ministër i Jashtëm, ka hapur dyert për bashkëpunim edhe me parti të tjera./N1