Ministri i Financave, Hekuran Murati, ka thënë se propozimi i tij që të bëhet zbritje e tatimit në pronë deri në 100 euro për faturën e vitit 2023, do të përfshihet në ligjin e ri.
Në një shkrim në Facebook, Murati iu ka përgjigjur deputetes së Lidhjes Demokratike të Kosovës, Hykmete Bajrami, e cila publikoi një letër në të cilën Ministria e Financave iu përgjigj një komune se komunat s’kanë të drejtë të falin tatime.
“Ministria demanton ministrin dhe e bën CC: Komunat nuk kanë të drejtë të falin tatime - propozimin e Muratit e hedhë poshtë ministria e tij. Çdo ditë po e dëshmojnë se janë Qeveri praktikantësh”, ka shkruar Bajrami në Facebook.
Ndërkaq, ministri Murati ka thënë se qëndrimet e tij janë të njëjta me ato të Departamentit Ligjor të MFPT-së. Ai ka thënë se javën tjetër do të nisin procedurat për projektligjin e ri.
“Atë çfarë kam thënë unë, e ka thënë edhe Departamenti Ligjor i MFPT-së: - që dispozitën për zbritjen e tatimit në pronë deri në 100 euro për faturën e vitit 2023 do ta përfshijmë në ligjin e ri. ⚡️Meqenëse tashmë janë bërë disa komuna që kanë mbështetur këtë nismë, ne si ministri, qysh javën që vjen do të nisim procedurat fillimisht duke lëshuar projektligjin për konsultime të brendshme, e pastaj edhe për konsultime publike, dhe pas kësaj do ta dërgojmë për miratim në Qeveri”, ka shkruar Murati.
Ishin degët e Vetëvendosjes nëpër komuna ato që iniciuan nëpër kuvende komunale që të bëhet falja e deri 100 eurove në tatimin në pronë për vitin 2023.
Ngritja e tatimit në pronë sivjet ka nxitur reagime të shumta te qytetarët. Ata janë alarmuar kur faturat u erdhën në vlerën mbi dyfish në krahasim me vitin e shkuar. Komunat patën akuzuar Ministrinë për rivlerësimin e pronave, e Ministria thoshte se komunat kanë qenë në dijeni se qytetarët do të paguajnë më shumë sivjet.
© KOHA. Të gjitha të drejtat janë të rezervuara.
