LDK-ja kërkon hetime të pavarura për kanosjen ndaj Abdixhikut e tre deputetëve
Lidhja Demokratike e Kosovës ka dalë me reagim publik pas raportimit për atentat ndaj kryetarit të saj dhe tre deputetëve.
LDK-ja i ka bërë thirrje organeve që të bëjnë hetime të pavarura dhe ta ruajnë diskrecionin në procesin hetimor.
Ditë më parë u konfirmua nga Policia e Kosovës se ka pasur raportime nga zyrtarë të LDK-së për ekzistimin e planeve për atentat ndaj zyrtarëve të lartë të kësaj partie, në krye me kryetarin Lumir Abdixhiku.
Komunikata e plotë LDK-së:
Lidhja Demokratike e Kosovës falënderon gjithë qytetarët e Kosovës në përgjithësi dhe anëtarësinë e saj në veçanti për përkrahjen dhe qetësinë e treguar deri më tani lidhur me informimin për planifikimin e atentateve ndaj kryetarit të LDK-së, Lumir Abdixhiku, dhe tre deputetëve të LDK-së.
Po ashtu LDK-ja falënderon partnerët ndërkombëtarë për mbështetjen e dhënë lidhur me këtë rast.
LDK-ja u bën thirrje organeve kompetente që, në përputhshmëri me seriozitetin e situatës, në të cilën cak potencial janë katër përfaqësues të qytetarëve të Kosovës, të zhvillojnë hetime të pavarura dhe të ruajnë profesionalizmin, si dhe diskrecionin lidhur me këtë proces hetimor.
