Arbëri

Bërnabiq: Kosova as nuk duhet të mendojë t’i largojë me forcë barrikadat

Kryeministrja e Serbisë, Ana Brnabiq, ka thënë se nuk beson në një skenar në të cilin policia e Kosovës do të largonte me forcë barrikadat në veri të Kosovës.

Bërnabiqi ka thënë po ashtu se nuk di si të diskutojë propozimin franko-gjerman kur siç ka thënë, marrëveshja e Brukselit ende nuk është zbatuar.

Duke folur për barrikadat në veri të Kosovës, Brnabiq deklaroi se Policia e Kosovës as që duhet të mendojë t'i largojë ato me forcë sepse do të ishte sulm ndaj grave dhe fëmijëve, të moshuarve dhe edukatorëve që janë mbi to.

“Unë nuk besoj në një skenar të tillë. Ka kuptim të mjaftueshëm nga ana e aktorëve ndërkombëtarë, mbi të gjitha KFOR-it”, ka thënë ajo duke iu përgjigjur gazetarëve.

Ajo vuri në dukje bashkëpunimin e mirë me KFOR-in, si dhe seriozitetin e treguar sepse siç ka thënë, ata janë ende duke e shqyrtuar kërkesën e Serbisë për kthimin e një pjese të forcave në Kosovë sipas rezolutës 1244.

“Ne presim që KFOR-i të bëjë një njoftim. Besoj se do të thotë diçka”, është shprehur ajo.

Bërnabiqi ka thënë gjithashtu se nuk di të negociojë një marrëveshje të re për zgjidhjen e problemit të Kosovës kur nuk është zbatuar marrëveshja e parë e Brukselit nga viti 2013.

“Ne presim që të zbatohet marrëveshja e parë e Brukselit. Nuk di si ta diskutoj propozimin e ri franko-gjerman kur propozimi i Brukselit nuk u zbatua dhe ishte i garantuar nga BE-ja”, tha ajo.

Ministri i Punëve të Brendshme të Kosovës, Xhelal Sveçla, ka thënë gjatë një konference për media këtë javë se janë duke pritur nga KFOR-i që të merr masa në lidhje me barrikadat e vendosura nga serbët në veri.

Sipas Sveçlës, nëse KFOR-i nuk vepron, atëherë institucionet e Kosovës mund t’i largojnë ato vetë, duke deklaruar se pritja ka fund.