MSH-ja e IKSHPK-ja me aktivitet për promovim të vaksinimit kundër COVID-19 e gripit sezonal
Ministria e Shëndetësisë (MSH) dhe Instituti Kombëtar i Shëndetësisë Publike (IKSHPK) të enjten do të nisin një aktivitet për promovimin e vaksinimit kundër gripit sezonal dhe kundër COVID-19.
Aktiviteti “Karvani i vaksinimit”, që mbështetet nga Organizata Botërore e Shëndetësisë, synon që të ndihmojë qytetarët për ta kuptuar sa më mirë rëndësinë e vaksinimit dhe njëkohësisht për t’u vaksinuar kundër gripit sezonal dhe kundër COVID-19.
Sipas MSH-së ky aktivitet do të zhvillohet në kohën kur në vende të ndryshme të botës numri i rasteve të reja me COVID-19, ka filluar të rritet.
“Për këtë qëllim, për një periudhë kohore prej më shumë se një muaji, në komunat e Kosovës, ekipet e vaksinimit do t’u mundësojnë qytetarëve që të vaksinohen përmes këtij aktiviteti”, thuhet në njoftimin e MSH-së.
Sipas njoftimit objektivat e aktivitetit janë inkurajimi i qytetarëve për vaksinimit kundër COVID-19 dhe kundër gripit sezonal dhe promovimi i sjelljeve parandaluese dhe masave të shëndetit publik, sigurimi që vaksinimi kundër Gripit sezonal dhe COVID-19 të jetë lehtësisht i arritshëm në komunitetet lokale, veçanërisht për popullatën me të ndjeshme dhe promovimi i pjesëmarrjes së drejtuesve të komunitetit në aktivitetet lokale për të adresuar pengesat në procesin e vaksinimit.
“Gjatë karvanit të vaksinimit, përveç vaksinës kundër Gripit sezonal, qytetarët do të mund të vaksinohen edhe me dozat bivalente përforcuese kundër COVID-19, të siguruara nga Ministria e Shëndetësisë”, thuhet në njoftim.
Sipas MSH-së aktiviteti do të nisë të enjten në komunën e Fushë-Kosovës dhe do të mbyllet më 2 shkurt të vitit që vjen në Prishtinë.
