Deputetja e Partisë Demokratike të Kosovës, Ganimete Musliu, ka kritikuar veprimin e ministrit të Brendshëm, Xhelal Sveçla, që në Facebook njoftoi se një natë më parë ka kaluar darkën me policët në Bërnjak, me ushqim të përgatitur nga një biznes në Prishtinë. Sipas Musliut, Sveçla po i rrezikon policët, ndërsa i ka kërkuar që të marrë vendim për heqjen e barrikadave në veri.

“Tregoni dikush Sveçlës që nuk është punë e Ministrit me shku me shpërnda bukë. Ai po i rrezikon edhe policinë duke shku me ba ‘sevapë’ me policë për një grusht vota. Mos ban filma, merr vendime!” ka shkruar Musliu në Facebook pasditen e së shtunës.

Në një postim tjetër, Musliu i ka quajtur Sveçlën dhe kryeministrin Albin Kurti “dështakë e shkatërrues të institucioneve”.

“Në njërën anë krenohen që kanë miratuar buxhetin ma të lartë për siguri, në anën tjetër sigurinë e vendit e trajton përmes rrugëve të bamirësisë. Xhelal Sveçla, Ministër i Brendshëm i Qeverisë së Albin Kurtit për turpin e tij e tonin si shtet, po mburret që ushqimin për policinë në Veri po e siguron përmes rrugës së bamirësisë. O dështakë, o shkatërrues të institucioneve, policinë e këtij vendi trajtojeni me dinjitet, siguroni paga, ushqim, armatim e veshmbathje. Zgjidheni drejtorin e policisë e mos na tregoni se sa bujarë e fisnikë janë shqiptarët sepse e dimë sikurse e dimë që ti dhe shefi yt nuk keni as plan e as vullnet për ta qeverisur këtë vend”, ka thënë ajo.

Në njoftimin e Sveçlës, ministri i Punëve të Brendshme ishte shprehur se institucionet e Kosovës kanë kapacitetet për t’i larguar barrikadat e vendosura në veri, e se po bëhet vlerësimi i situatës për reagim adekuat.

“Veriu i vendit tonë, si çdo cep i Republikës sonë duhet të kthehet sa më shpejtë në normalitet”, ka shkruar ai.

Ka një javë që rrugët që çojnë në pikëkalimet kufitare me Serbinë, Jarinjë e Bërnjak, janë bllokuar si pasojë e barrikadave të vendosura nga serbë lokalë, pas arrestimit të një ish-polici serb të Kosovës, nën dyshimet për sulme ndaj Policisë së Kosovës e zyrave të Komisioneve Komunale Zgjedhore në veri të vendit.