Përfaqësuesi i Lartë i Bashkimit Evropian (BE) për Politikë të Jashtme, Josep Borrell, ka folur për tensionet në veri të Kosovës, në konferencë për media pas takimit të ministrave të jashtëm të shteteve anëtare të BE-së.
Ai ka thënë se situata aktuale nuk është e pranueshme, ndërsa ka theksuar se u ka bërë kërkesë shteteve anëtare që të përforcojnë EULEX-in me trupa shtesë, nëse është e nevojshme dhe se kjo kërkesë ka hasur në mirëkuptim nga shtetet.
“Që nga gushti, jemi në një rreth vicioz të konfrontimeve, provokimeve dhe reagimeve, që kanë përshkallëzuar në ditët e fundit, dhe kanë provokuar incidente serioze të sigurisë, përfshirë edhe një sulm ndaj misionit tonë, EULEX-it dhe ndaj Policisë së Kosovës. Barrikadat që bllokojnë rrugët, njerëz të armatosur nëpër rrugë, nuk është diçka që jemi të gatshëm ta pranojmë, nuk pranojmë këtë nga partnerët tanë, që po aspirojnë një të ardhme evropiane. Kjo situatë duhet të mbarojë e barrikadat duhet të largohen. Qetësia duhet të kthehet. Këshilli qartë u ka bërë thirrje të dyja palëve për qetësi dhe frenim nga veprimet e dhunshme e provokative. I kam kërkuar shteteve anëtare që të jenë të gatshme të dërgojnë më tepër njësite në misionin tonë të EULEX-it. E shumë nga to janë pajtuar e kanë shprehur gatishmëri për të rritur kapacitetet nëse është e nevojshme”, ka thënë Borrell.
Borrelli tregon se ka marrë përkrahjen e 27 shteteve të BE-së për propozimin që ua ka bërë Kosovës e Serbisë
Ai ka thënë se si Kosova, ashtu edhe Serbia kanë thënë se janë të gatshme për të depërshkallëzuar situatën dhe ka theskuar se shpreson që të ndodhë kjo. Borrell ka thënë se propozimi, që ishte njohur si “franko-gjerman”, ka përkrahjen e fortë të 27 shteteve anëtare të Bashkimit Evropian.
“E di se dyja palët kanë dhënë indikacione se janë të gatshme të depërshkallëzojnë situatën dhe shpresoj se do ta bëjnë. Dhe shpresoj se nuk do të nisin ta përshkallëzojnë sërish. Duhet të kthehen sërish në dialogun e lehtësuar nga BE-ja, një detyrë të cilën Bashkimi Evropian e ka marrë nga Asambleja e Përgjithshme e Kombeve të Bashkuara, e po ashtu edhe unë si lehtësues i dialogut. Është esenciale si për Serbinë ashtu edhe për Kosovën për rrugën e tyre evropiane”, ka thënë Borrell. “Si lehtësues – insiston, të implementojë detyrën e marrë nga Kombet e Bashkuara – qysh pas incidenteve të fundit gjatë verës, ne u kemi vendosur në tavolinë një propozim të dy liderëve. Dhe e kemi përditësuar atë në javët e fundit, pas marrëveshjes së fundit – që ishte supozuar të ishte ajo definitive për të lënë anash tensionet të lidhura me targat dhe po ashtu një çështje tjetër të lidhur me komunat serbe në veri të Kosovës. Ne e kemi vendosur këtë propozim dhe tash duhet ta shtyjmë para si çështje urgjente. Jam i lumtur për përkrahjen e madhe që kam marrë nga të gjitha ministrat për këtë iniciativë, që është implementimi i detyrës së marrë nga Kombet e Bashkuara. Tash është bërë propozim i 27 shteteve anëtare të BE-së. Nuk është propozim i imi. Po bëhet propozim i 27 shteteve anëtare”.
Lajçak të mërkurën në vizitë në Kosovë e Serbi
Ai ka treguar se emisari i BE-së për dialogun Kosovë – Serbi, Miroslav Lajçak, udhëton të mërkurën për vizitë në Kosovë e Serbi, për të tentuar të qetësojë situatën. E po ashtu Borrell ka paralajmëruar se nesër do të bëhet një njoftim për situatën në Komitetin Politik.
“Marrë parasysh situatën urgjente dhe të rrezikshme në terren, i kam kërkuar emisarit për dialogun Miroslav Lajçak, të udhëtojnë në rajon. Nesër, do të ketë një përmbledhje para Komitetit Politik dhe të Sigurisë, një analizë e thellësishme e këtij propozimi dhe pasnesër, Miroslav Lajçak do të udhëtojë në rajon në mënyrë që të kthehet para Këshillit Evropian, ku do të bëhet një vlerësim dhe do të informohen liderët për situatën në Kosovë”, ka thënë Borrell.
© KOHA. Të gjitha të drejtat janë të rezervuara.
