Arbëri

Sulmet në veri, vjen reagimi i Edi Ramës

Edi Rama - BE

Kryeministri i Shqipërisë, Edi Rama, ka reaguar më në fund, pas disa ditëve të sulmeve në veri të Kosovës.

Rama ka dënuar sulmin mbi patrullën e EULEX-it në veri, e po ashtu sulmet ndaj Policisë së Kosovës.

"Sulmet mbi EULEX-in janë të dënueshme pa asnjë ekuivok ashtu siç është i dënueshëm çdo akt dhune ndaj policisë së Kosovës. Rishfaqja e barrikadave në veri të Kosovës, bie ndesh me çdo ligj e çdo frymë dialogu e jo vetëm nuk zgjidh asgjë, po përkundrazi komplikon më tej çdo gjë!” – ka shkruar Rama në Twitter.

Ai ka mirëpritur vendimin për të shtyrë zgjedhjet në veri të Kosovës. Ndërsa i ka bërë thirrje Beogradit, që të ushtrojë ndikimin mbi serbët në veri të Kosovës. Po ashtu ka bërë thirrje që BE-ja të thërrasë palët në dialog.

“Shtyrja e votimeve nga ana e Presidentes së Republikës së Kosovës është një sinjal kuptimplotë, të cilit autoritetet e larta të Beogradit duhet t’i përgjigjen me të njëjtën frymë dhe ndjenjë përgjegjësie, për moslejimin e përshkallëzimeve të mëtejshme të akteve destabilizuese! Beogradi duhet të ushtrojë ndikimin e vet mbi serbët e Veriut të Kosovës, pa i justifikuar assesi veprimet e tyre cilatdoqofshin arsyet! Arsyet diskutohen nuk përdoren si armë kundër policisë e si barrikada kundër rendit ligjor.BE-ja duhet të thërrasë urgjent tryezën e dialogut”, ka shkruar Rama.