Arbëri

Spahiu: Shqipëria s’ka interesim të bashkohet me Kosovën

Publicisti Nexhmedin Spahiu tha se në “Sonte me Rronin” se Shqipëria nuk ka shprehur interesim që të bashkohet me Kosovën, e sipas tij, aq më pak kryeministri Edi Rama.

Spahiu tha të mërkurën se Kosova dhe Shqipëria nuk mund të kuptohen mirë mes vete pasi sipas tij, s’i ka pasur sundimet dhe liderët e njëjtë.

“Ne nuk mund të kuptohemi mirë me Shqipërinë sepse ne s’e kemi parasysh s’i ka qenë sundimi i Enver Hoxhës, e as ata s’e dinë sepse s’e kanë përjetuar sundimin e Rankoviqit apo të Millosheviqit. Në momentin kur Kosova është njohur si komb, mund ta ndërrojë emrin dhe të quhet Republika e Dardanisë, apo Republika e Shqipërisë Veriore. Shqiptarët e Kosovës e përbëjnë kombin kosovar. Në Kosovë, komb janë shqiptarët e Kosovës. Të tjerët kanë statusin e komuniteteve, por në të ardhmen mund të integrohen dhe të bëhen pjesë e kombit”, deklaroi Spahiu.

Sipas publicistit, Kosova është komb në vete sepse posedon shtetin.

“Etnia është koncept i thjesht, perceptimi për prejardhjen dhe nëse je shqiptar, s’ka lidhje ku jeton. Por që, kombi është një koncept më kompleks, që ka të bëjë me aftësinë për të krijuar dhe ndërtuar shtet. Në momentin që arrin të krijosh atë shtet, ai bëhet komb. Shteti i pavarur dhe sovran është sinonim i të qenit komb. Shteti është dëshmia që ti je komb. Shtetet kanë ekzistuar edhe para kombeve, por jo këto shtetet e sotme”, tha ai.

Spahiu deklaroi se në Kuvendin e Prizrenit, më 8 dhe 10 korrik të 1945-s, ishte vendosur që Kosova të ndahej nga Shqipëria dhe t’i bashkëngjitej Serbisë Federale. Nga kjo, sipas Spahiut, nisi të qarkullonte dinari serb dhe ndarja e Kosovës shkaktoi konflikte në Shqipëri.

Spahiu, duke folur për kombin kosovar, u shpreh se Kosova mund dhe duhet ta ndërrojë himnin.

“Ne mund ta ndërrojmë edhe himnin. Po propozoj publikisht që të ndërrohet, të bëhet ‘Kur ka ra kushtrimi në Kosovë’ sepse i përshtatet konceptit tonë. Parlamenti me 2/3 mund ta ndërrojë himnin. Duhet një himn që më tepër i përshtatet konstruktit mendor tonë. Krijues i kombit kosovar është Ibrahim Rugova, ka pasur lëvizjen politike në duar”, u shpreh ai.