Instituti Kombëtar i Shëndetësisë Publike ka njoftuar se në mostrat e mbledhura të martën në të gjithë vendin, uji i sistemeve të goditura nga shirat dhe përmbytjet ka ende vlerë të shtuar të turbullirës në ujin e pijshëm.
Sipas njoftimit, nga mostrat laboratorike mikrobiologjike të përpunuara deri më tani, disa nga ato rezultojnë me baktere koliforme dhe si të tilla nuk janë brenda standardeve të parapara.
“Uji nga këto sisteme nuk i plotëson standardet e kërkuara të ujit të pijshëm. Në zonat me burime nëntokësore dhe sistemet që nuk u prekën nga reshjet, monitorimi vijon edhe sot dhe ekipet në teren raportuan se analizat laboratorike fiziko-kimike dhe bakteriologjike janë brenda standardeve për ujin e pijshëm”, thuhet më tej në njoftimin e IKSHPK-së, raporton KSP.
Ky institut ka rekomanduar të gjitha kompanitë rajonale të ujësjellësit me qëllim të stabilizimit të furnizimit të përdorin burimet e paprekura, të furnizohen me cisterna me ujë të pijshëm, të riparojnë dhe zhbllokojnë pusetat dhe të riparojnë dëmtimet në rrjetin shpërndarës.
