Kryetari i Partisë Demokratike të Kosovës, Memli Krasniqi, në ditën e dytë të vizitës së tij zyrtare në Shtetet e Bashkuara të Amerikës, është pritur në Departamentin Amerikan të Shtetit nga Zëvendësndihmës i Sekretarit të Shtetit, Gabriel Escobar, njëherësh i Dërguar i Posaçëm i SHBA-së për Ballkanin Perëndimor.
Kryetari i PDK-së e ka falënderuar Escobarin për të gjitha etapat e mbështetjes së palëkundur amerikane për Kosovën.
Në këtë takim, kreu i opozitës së Kosovës ka shprehur qëndrimin e PDK-së se rreshtimi dhe koordinimi i Kosovës me SHBA-në është pa alternativë.
Ai shtoi se SHBA-ja i ka dhënë dhe i jep Kosovës mbështetje të vazhdueshme në procesin e integrimit dhe fuqizimit në arenën ndërkombëtare, përfshirë synimin e Kosovës për anëtarësim në NATO, BE dhe OKB.
“Escobarin e sigurova se qëndrimi i popullit të Kosovës, e pa dyshim edhe i PDK-së si lidere e opozitës, për ruajtjen dhe fuqizimin e raporteve bilaterale dhe strategjike ndërmjet Kosovës dhe SHBA-ve është i padiskutueshëm dhe i pandryshueshëm. Kur Shtëpia e Bardhë është adresa dhe kur aleanca me SHBA-të është rruga, afirmimi dhe suksesi kombëtar e shtetëror i Kosovës është destinacion i pashmangshëm”, ka thënë Krasniqi.
Krasniqi e ka siguruar Escobarin se PDK-ja do ta ofrojë gjithë mbështetjen dhe ndihmën e saj për çdo çështje që prek interesin shtetëror të Kosovës.
“Gjatë takimit diskutuam edhe për situatën dhe sfidat aktuale për sigurinë e Kosovës dhe domosdoshmërinë e intensifikimit të përpjekjeve në dialog me Serbinë, për arritjen e një Marrëveshjeje Gjithëpërfshirëse – me njohjen reciproke në qendër”, deklaroi Krasniqi.
“Tregimi i suksesit të Kosovës që nga çlirimi, pavarësia dhe shtetndërtimi është bërë falë koordinimit të ngushtë me SHBA-në”, shtoi ai.
Dy ditë më herët, Escobari priti në takim edhe kryetarin e Lidhjes Demokratike të Kosovës, Lumir Abdixhiku.
