Ministrja e Arsimit, Arbërie Nagavci, ka thënë se dhuna, në çfarëdo forme, është e papranueshme, është akt i lig dhe i shëmtuar, prej kujtdo që ushtrohet, sidomos kur bëhet fjalë për kategori të ndjeshme.
Ajo ka shkruar në Facebook se të gjithë janë të ndjeshëm përballë nënave, sepse nënat janë sinonim i mirësisë dhe dashurisë së pafundme!
|Prandaj, sot, të gjithë jemi të tronditur, të trishtuar, të mllefosur, pa fjalë që shprehin saktë gjithë emocionet tona, me pamjet që pamë një nënë, në të cilën ushtrohet dhunë në një shtëpi të kujdesit për pleqtë. Aq më tepër, kur bëhet fjalë për një nënë, që në qenien e vet ka bartur dhimbjen e madhe për djalin e saj dëshmor. Edhe më të dhimbshëm e bën fati, që nëna ishte edhe e sëmurë”, ka shkruar ai.
Sipas saj, shqetësues është edhe fakti se këto sjellje dhune pranohen si normale, e reagimet janë kolektive në rastet si kjo, kur shpërfaqet brutalitet ekstrem.
“Në këtë drejtim, roli i edukimit brenda institucioneve arsimore është kyç, sepse jemi përgjegjës për të krijuar gjenerata që sigurojnë vazhdimësinë e vlerave njerëzore, edhe në rastet kur familja për arsye të ndryshme mund të mos arrijë të transmetojë vlerat e domosdoshme morale, gjë që qon edhe tek formësimi i karaktereve që ushtrojnë dhunë, madje edhe ndaj kategorive të ndjeshme të shoqërisë”, ka thënë ajo.
Ajo i ka ftuar mësimdhënësit e prindërit, shoqërinë civile, mediat dhe të gjithë qytetarët, që të punojnë bashkë me institucionet përgjegjëse qendrore e lokale në edukimin e gjeneratave të reja dhe ngritjen e vetëdijes shoqërore për kujdesin ndaj kategorive të ndjeshme.
“Të gjithë bashkë të kujdesemi për një kulturë ku respektohen vlerat, për kujdes të veçantë ndaj kategorive të ndjeshme, e sidomos për të moshuarit, sepse ata janë prindërit tanë dhe kështu bota dhe liria do të jetë shumë më e bukur”, ka thënë ajo.
© KOHA. Të gjitha të drejtat janë të rezervuara.
