“Kosova duhet të lejojë periudhë më të gjatë tranzicioni. Kjo ka qenë këshilla e vazhdueshme e partnerëve më të afërt të Kosovës, përfshirë BE-në dhe SHBA-në. Është zhgënjyese të shohim që s’është përfillur”, thuhet në reagimin e BE-së në lidhje me vendimin e Qeverisë për targat. Të shtunën në mbrëmje, BE-ja ka theksuar se marrëveshja e vitit 2016 parasheh proces të përcaktuar për periudhë 12-muajshe për procesin e largimit të targave, “që nuk është përfillur”

Pas Shteteve të Bashkuara të Amerikës, edhe Bashkimi Evropian është shprehur i zhgënjyer me Qeverinë e Kosovës për vendimin që t’i shkallëzojë sanksionet ndaj atyre që nuk i kthejnë targat ilegale në RKS, duke refuzuar shtyrjen e tij, siç kërkuan partnerët ndërkombëtarë.

“Kosova ka të drejtë t’i largojë gradualisht targat KM, por procesi duhet të marrë kohë në përputhje me Marrëveshjen në Dialog dhe të implementohet në mënyrë gjithëpërfshirëse e konsultative. Përderisa vendimi është hap në drejtim të duhur, nuk është në përputhje me Marrëveshjet e Dialogut, që janë obligative për të dyja palët”, thuhet në reagimin e Bashkimit Evropian.

Në reagimin e BE-së theksohet se marrëveshja e vitit 2016 parasheh proces të përcaktuar për periudhë 12-muajshe për procesin e largimit të targave, “që nuk është përfillur”.

“Kosova duhet të lejojë periudhë më të gjatë tranzicioni. Kjo ka qenë këshilla e vazhdueshme e partnerëve më të afërt të Kosovës, përfshirë BE-në dhe SHBA-në. Është zhgënjyese të shohim që s’është ndjekur”, thuhet në reagim të publikuar të shtunën në mbrëmje.

Bashkimi Evropian ka thënë se është e domosdoshme që të ruhet qetësia.

“Ne u bëjmë thirrje të gjitha palëve të përfshira që të përmbahen e të shmangin çdo veprim a retorikë që mund ta rrezikojë stabilitetin në terren, veçanërisht në veri të Kosovës. BE-ja do të vazhdojë, bashkë me partnerët e vet, të angazhohet me Kosovën dhe Serbinë. Ne presim nga palët që të angazhohen në mënyrë konstruktive dhe me mirëbesim për të gjetur zgjidhje pa vonesa të mëtejme, në përputhje të plotë me Marrëveshjet e Dialogut”, përfundon reagimi i BE-së.

Të premten, Qeveria e Kosovës bëri të ditur planin për zbatim të vendimit për targat. Paraprakisht, afati ishte që targat të konvertohen në RKS deri më 21 tetor. Vendimi i ri, sipas Qeverisë, ishte shkallëzim i sanksioneve për moszbatuesit. Kryeministri Albin Kurti e cilësoi vendimin si “përgjigje për ndjeshmërinë e shtuar ndërkombëtare për paqen dhe sigurinë”. Me vendimin e ri, nga 1 nëntori deri më 21 nëntor do të vlejë masa e qortimit për ata që s’i konvertojnë targat. Pastaj nga 21 nëntori deri më 21 janar do të jetë masa e gjobitjes e më pas deri më 21 prill do të ketë targa provuese. Sipas Kurtit, pas 21 prillit s’mund të ketë targa të tjera në Republikën e Kosovës.

Menjëherë pas vendimit, Shtetet e Bashkuara të Amerikës u shprehën të zhgënjyera dhe shqetësuara “që Qeveria e Kosovës ka refuzuar kërkesat e partnerëve ndërkombëtarë” për ta shtyrë vendimin për 10 muaj.

Deri tash, 20 qytetarë kanë shfrytëzuar afatin e deritashëm për t’i kthyer targat ilegale në ato RKS, ka bërë të ditur Ministria e Punëve të Brendshme.