Arbëri

Për një muaj, barnat Zelboraf dhe Cotellic i kushtojnë një pacienti me kancer lëkure mbi 2,000 €

Zelboraf dhe Cotellic janë dy nga barnat që onkologët ia kanë përshkruar për trajtim një pacienteje që është diagnostikuar me kancer të lëkurës.

Kjo pasi imunoterapia, e cila përdor sistemin mbrojtës të trupit për t’i vrarë qelizat e kancerit, është vlerësuar nga profesionistët shëndetësorë në Klinikën e Onkologjisë si më efektive.

Por, familjarë të pacientes, tek folën në kushte anonimiteti, thanë se këto barna nuk i kanë gjendur në QKUK. Ka treguar për çmimin e mundshëm të tyre jashtë vendit.

“Në Kosovë kemi shikuar te një barnatore, por nuk kemi marrë ende përgjigje. Në Onkologji kanë thënë që më së lehti mund t’i gjeni në Turqi. Dhe në Turqi, pasi kemi parë atje, kemi marrë përgjigje se njëri prej barnave kushton 2 mijë euro, kurse tjetri kushton 600 euro. Terapia do të zgjatë 6 muaj për fillim dhe këto barna tash duhet të sigurohen për çdo muaj. Domethënë, çdo muaj duhet të jetë kjo shumë e parave që duhet t’i paguajmë”, tha një familjar në kushte anonimiteti.

Medikamentet që janë përshkruar në këtë rast nuk janë në Listën e Barnave Esenciale, që sigurohen nga buxheti i shtetit.

Në Klinikën e Onkologjisë thanë se është bërë kërkesë që në listë të përfshihen edhe këto barna, nga të cilat trajtohet melanoma malinje, por edhe format e tjera të kancerit.

“Ne si Klinikë, si kolegjium, kemi dhënë rekomandime në fakt për komisionin për revidim të listës për të gjitha medikamentet që mendojmë se kishin për të dhënë një zgjidhje meritore për trajtim të pacientëve tanë gjatë vitit të ardhshëm”, u shpreh Arben Bislimi, u.d. drejtor i Klinikës së Onkologjisë.

Në Ministrinë e Shëndetësisë nuk treguan nëse Zelboraf dhe Cotellic do të përfshihen në listën e re, që është duke u përditësuar.

“Aktualisht, komisioni kyç për përditësimin e Listës së Barnave Esenciale ka filluar punën në përditësimin e listës aktuale dhe specialistët nga secila fushë kanë mandatin që në kuadër te Komitetit kyç të vendosin cilat barna do të jenë në listën e re e cilat jo, bazuar në standardet e përcaktuara për hartimin e kësaj liste”, thuhet në përgjigjen e MSH-së.

Ndërkaq në Komisionin për përditësimin e Listës së Barnave Esenciale kanë thënë se ende nuk janë në fazën e propozimeve nga palët e treta.

“Prandaj, si konkludim, komiteti kyç dhe nënkomitetet janë duke punuar në përpilimin e listës për të cilën po flisni. Kur të përfundojë puna nëpër nënkomitete dhe pas shpalljes të afatit për propozime nga palët e interesuara, komiteti do t’i diskutojë propozimet konkrete dhe do të marrim vendimet përkatëse sipas standardeve të OBSH-së. Ky proces do të jetë transparent dhe të gjitha vendimet do të jenë të qasshme për publikun”, deklaroi Driton Vela, kryesues i Komisionit për përditësimin e barnave nga LE.

Zelboraf dhe Cotellic nuk janë as në listën e barnave esenciale të OBSH-së, me arsyetimin se nuk janë më efikase sesa barnat e tjera të cilat përdoren për këtë sëmundje.

Lista aktuale e barnave esenciale ishte nënshkruar në vitin 2019.