Samiti i Procesit të Brdo-Brionit mbyllet me thirrjen që Kosovës t’i hiqen vizat

Presidenti i Sllovenisë, Borut Pahor, i bëri thirrje Bashkimit Evropian që ta përfundojë procesin e liberalizimit të vizave për Kosovën dhe Bosnjë-Hercegovinës t’ia japë statusin e shtetit kandidat.

Ai deklaroi të hënën, pas samitit të Procesit Brdo-Brioni, Slloveni, se me liderët e vendeve të rajonit, u dakorduan që bisedimet të jenë forma e vetme për zgjidhje të çështjeve, ndonëse sipas tij, pati dallime të mëdha mes shteteve.

“Takimi u mbyll me sukses për dy arsye: diskutimet kanë qenë mjaft të mira dhe kemi dashur të insistojmë që të jemi më të bashkuar. Por ka disa gjëra që na ndajnë, por duhet të kuptojmë se ku janë këto dallime”, deklaroi Pahor.

Sipas presidentit slloven, BE-ja duhet ta përshpejtojë procesin e integrimit të vendeve të Ballkanit Perëndimor dhe t’i ndihmojë vendet në krizën për energjinë elektrike dhe furnizimit me ushqime.

“Kur u përgatitëm për konferencë, kishim disa dallime. Niveli i besimit nuk është në nivelin më të lartë të munshdëm. Gjatë fazës përgatitore për konferencë, ne kuptuam se ndoshta do të jetë e vështirë ta organizojmë këtë takim. Kjo nuk do të jetë pengesë për Ballkanin Perëndimor. Më vjen mirë që të gjithë kanë marrë pjesë në Samit. Kishim dallime të mëdha, por e kuptuam se nuk mund t’i zgjidhim këto dallime, prandaj u përqendruam në aspektet e përbashkëta”, shtoi ai.

Procesi i Brdo-Brionit filloi në vitin 2010 kur kryeministrat e atëhershëm slloven dhe kroat, Borut Pahor dhe Jadranka Kosor, pas nënshkrimit të një marrëveshjeje arbitrazhi mes dy vendeve, donin të jepnin shembull për liderët e Ballkanit Perëndimor dhe t'i inkurajonin ata në zgjidhjen e çështjeve dypalëshe.

Që nga viti 2013, takimet në kuadër të Procesit Brdo-Brioni mbahen çdo vit dhe mbledhjes së liderëve rajonalë iu bashkuan të ftuar specialë, duke përfshirë ish-kancelaren gjermane Angela Merkel, ish-presidentin e Austrisë Heinz Fischer, presidentin e Gjermanisë Frank-Walter Steinmeier, presidentin e Polonisë, Andrzej Duda, presidentin aktual të SHBA-së, atëherë nënpresident, Joseph Biden dhe përfaqësues të institucioneve evropiane.

Gjashtë konkluzionet e Samitit të Brdo-Brionit:

Ne kemi përsëritur se politika e zgjerimit të BE-së është kontribuuesi më i drejtpërdrejt për mbajtjen e paqes dhe stabilitetit në rajonin tonë dhe më tepër se kurrë është një çështje gjeopolitike.

Ne bëjmë thirrje për përshpejtimin e procesit të integrimit në BE, në përputhje me kushtet mirë të vendosura për anëtarësim në BE.

Bëjmë thirrje që t’i ofrohet statusi i kandidatit Bosnjë-Hercegovinës deri në fund të vitit 2022.

Bëjmë thirrje që të hiqet regjimi i vizave për gjithë Ballkanin Perëndimor, deri në fund të vitit 2022.

Ne i bëjmë thirrje BE-së që të qëndrojë krah për krah me Ballkanin Perëndimor për zbutje të pasojave të krizës ekonomike dhe energjetike.

Ne rikonfirmojmë përkushtimin tonë të fuqishëm se dialogu është zgjidhja e vetme e zbatueshme për dallimet që ekzistojnë dhe për çështjet e hapura politike në rajon.

Presidentja e Kosovës, Vjosa Osmani, është takuar të hënën me homologun e Malit të Zi, Milo Gjukanoviq, në kuadër të samitit të procesit Bdro-Brioni.

Osmani shkroi në Twitter se me Gjukanoviqin diskutuan mbi zhvillimet aktuale në Evropë dhe në rajon, duke theksuar rëndësinë themelore të bashkëpunimit “që synon promovimin e paqes, stabilitetit dhe së ardhmes euroatlantike”.

Pjesëmarrës në këtë samit do të jenë edhe kryetarët e Shqipërisë, Kroacisë, Malit të Zi, Maqedonisë së Veriut, Serbisë dhe tre anëtarët e Presidencës së Bosnjë-Hercegovinës.

Të hënën (sot) mbahet samiti i Procesit Brdo-Brioni, ku temë kryesore është paralajmëruar të jetë siguria në Ballkanin Perëndimor.

Presidentja Vjosa Osmani do të përfaqësojë Kosovën në këtë takim, ndërkohë ajo ka shkuar në Slloveni të dielën mbrëma, ku është pritur nga kryetari i këtij vendit, Borut Pahor, ka bërë të ditur Zyra për Informim e Presidencës.

Pjesëmarrës do të jenë edhe kryetarët e Shqipërisë, Kroacisë, Malit të Zi, Maqedonisë së Veriut, Serbisë dhe tre anëtarët e Presidencës së Bosnjë-Hercegovinës.

© KOHA. Të gjitha të drejtat janë të rezervuara.