Nagavci thotë se kërkesat e sindikalistëve janë përmbushur në Draftligjin për paga
Foto: Alban Bujari / KOHA
Ministrja e Arsimit, Arbërie Nagavci, ndërsa ka sqaruar se të gjitha kërkesat e sindikalistëve janë përmbushur në Draftligjin për paga, ka thënë se të gjithë duhet të kontribuojnë për fillim të mbarë të vitit të ri shkollor. Nagavci i ka konfirmuar mospajtimet me komunat sa i përket komunikimit rreth grevës
Të gjitha librat kanë mbërritur në shkolla, përveç atyre të klasës së pestë, kanë thënë në Ministrinë e Arsimit, Shkencës dhe Teknologjisë. Por, fillimi i vitit të ri shkollor më 1 shtator pritet të mos nisë në të gjitha shkollat në nivel vendi shkaku i grevës së Sindikatës së Bashkuar të Arsimit. Ministrja Arbërie Nagavci i ka përsëritur thirrjet e saj për mobilizim, në mënyrë që të fillohet mbarë viti i ri shkollor.
“Fokusi i të gjithë neve duhet të jetë përmirësimi i humbjeve dhe ngritja e cilësisë në arsim. Fëmijët tanë meritojnë dhe duhet t’u ofrojmë më mirë. Andaj ju ftoj të gjithëve, të dashur mësues, drejtorë shkollash, zyrtarë komunalë e punëtorë të tjerë të arsimit, të dashur prindër, që të punojmë bashkë për nxënësit e për mësuesit, për të gjithë ne. Ftoj prindërit, mësimdhënësit, nxënësit, që të gjithë së bashku të mobilizohemi e ta fillojmë mbarë vitin e ri shkollor. Nga zhvillimi i procesit mësimor përfitojmë të gjithë”, ka thënë Nagavci.
Ministrja ka konfirmuar mospajtimet me përfaqësuesit e komunave, ku këtyre të fundit u janë kërkuar lista të mësimdhënësve grevistë. Ajo ka thënë se në fakt janë kërkuar lista të shkollave të hapura dhe të mbyllura si pasojë e grevës.
“Si Ministri e Arsimit ne kemi kërkuar të dhëna për mbarëvajtjen e procesit mësimor, i kemi kërkuar edhe në të kaluarën, do të vazhdojmë ta bëjmë. Po komunat janë ankuar dje, por ne do të vazhdojmë me kërkesat tona edhe sot, edhe nesër, edhe për çdo ditë. Sepse, si ministri duhet ta dimë se a kemi shkolla që po punojnë apo jo. Në bazë të informatave që i kemi edhe në Komunën e Prishtinës kanë qenë 4-5 shkolla që nuk e kanë shpallur grevën”, ka bërë të ditur ajo.
Nagavci ka përsëritur se nuk është duke bërë dialog me SBASHK-un, pasi kërkesat e sindikalistëve Ministria i ka përmbushur në Draftligjin e pagave. Mësimdhënësit ajo i ka këshilluar që ta lexojnë Ligjin e grevave.
Mesazhin e fillimit të mësimit më 1 shtator, me gjithë grevën, Nagavci synon ta përçojë në Gjakovë, ku ka paralajmëruar se do të shkojë për ta promovuar Abetaren e përbashkët me ministren e Arsimit të Shqipërisë, Evis Kushi.
