Arbëri

Institucionet arsimore funksionojnë me klasa të mbipopulluara

Institucionet arsimore në zonat urbane po përballen me hapësira të pamjaftueshme. Për shkak të numrit të madh të nxënësve, shkolla “Mihal Grameno” në Fushë-Kosovë, rrezikon ta nisë vitin shkollor me tri e katër mes ndërrime. Me klasa të mbipopulluara përballet edhe shkolla “Naim Frashëri” në Podujevë. Sipas psikologëve, vijimi i procesit mësimor gjatë mesditës ndikon në uljen e produktivitetit.

Me hapësira të pamjaftueshme po përballen disa nga institucionet arsimore në zonat urbane.

Nga 1 shtatori, shkolla “Mihal Grameno” në Fushë-Kosovë, do të detyrohet ta zvogëlojë orën mësimore në 40 minuta.

“Për momentin jemi me dy ndërrime, por planifikohet tash me mesndërrime, faktikisht me tri apo katër ndërrime, sepse është rritje e madhe e nxënësve në këtë shkollë... Ka klasë me 43 nxënës, por mesatarja është me 39 nxënës në të gjitha paralelet, këtë vit po planifikojmë të zvogëlojmë numrin e nxënësve në paralele”, ka thënë Ismet Gashi, drejtor në SHFMU “Mihal Grameno”.

Në Drejtorinë e arsimit kanë thënë se kanë planifikuar ndërtimin e dy objekteve të reja shkollore.

“Në dekadën e fundit janë ndërtuar tri shkolla me kapacitet secila prej tyre mbi 1.200 nxënës derisa në plan janë të ndërtohen edhe dy shkolla të reja. Për njërën janë ndarë mjetet dhe do të fillohet këtë vit, mirëpo problemi është te pronat, te parcelat e komunës, ne jemi komuna më e varfër në Kosovë sa i përket pronave komunale”, ka thënë drejtori i Arsimit në Fushë Kosovë, Samir Shahini.

Në të njëjtën situatë është edhe shkolla në Podujevë, “Naim Frashëri”, ku klasat janë të mbipopulluara. Për këtë Ministria e Arsimit ende nuk ka një zgjidhje.

“Komuna e Podujevës aktualisht e ka bërë një kërkesë për ndërtim të shkollës në qytetin e Podujevës, e cila do të shqyrtohet bazuar në udhëzimin administrativ për investime kapitale për investime në vitet në vijim”, thuhet në përgjigjën e Ministrisë së Arsimit.

Ministria e Arsimit nuk ka treguar nëse ka të dhëna se sa shkolla funksionojnë me dy dhe tri ndërresa. Në pyetjet e KOHËS, kjo ministri ka vendosur të përgjigjet vetëm te ndërtimi i objekteve të reja shkollore.

KOHA ka raportuar se gjatë vitit të kaluar, mbi 600 shkolla kanë funksionuar me dy ndërresa, ndërsa disa kanë qenë me tri.

“MASHTI investon në të gjitha zonat, veçanërisht ato urbane ku ka numër të madh (të mbipopulluar të nxënësve) në komunat ku ka kërkesa dhe ku paraprakisht është siguruar lokacioni, por në mungesë të lokacioneve në disa qytete - zona urbane nuk po ka mundësi investimi të ndërtimit të shkollave që të zvogëlohet numri i ngarkuar me nxënës. Në Gjilan është ndërtuar shkolla e artit, e cila këtë vit shkollor fillon funksionimin me ç’rast zhvendosen 2 shkollat e artit dhe lirohen hapësirat në shkollat e mesme, por edhe në këtë qytet nuk ka kërkesë me lokacione të siguruara për ndërtim të shkollave ku edhe me rastin e investimit të ndërtimit të shkollave nga BE me IPA 2017, ku prioritet për ndërtimin e një shkolle ishte edhe qyteti i Gjilanit, investimi nuk u realizua për mungesë lokacioni. Në Pozhoran –Viti është duke u ndërtuar shkolla e re, me ç’rast do të ketë hapësira të mjaftueshme edhe për mbajtjen e mësimit me një ndërrim”, thuhet tutje në përgjigjen e MASHTI-t.

Sipas psikologut Yll Avdijaj, infrastruktura shkollore është e rëndësishme në performancën e nxënësve. Ai tregon se vijimi i procesit mësimor gjatë mesditës ndikon në uljen e produktivitetit.

“Janë gjëra që e përcaktojnë indirekt jodirekt, mirëpo indirekt ndikojnë të dikush më shumë, e te dikush më pak, mirëpo që janë gjëra që duhet të jenë të vëmendshme institucionet ose personeli që kujdeset për këtë aspekt në mënyrë që t'u ofrojë kushte sa më të mira, që nxënësit të jenë sa më produktivë”, ka thënë Avdijaj.

Sivjet, sipas Ministrisë, katër objekte të reja shkollore priten të jenë në shfrytëzim për nxënësit.

Ky artikull është në dispozicion për t’u ritransmetuar nga mediume të tjera, duke e cituar KOHËN si burim.