Goncharenko: Serbia “Kali i Trojës” i Putinit

Deputeti ukrainas Oleksyi Goncharenko nuk e sheh Serbinë si aleate të Ukrainës.

Ai thotë se Serbia kryesisht e përkrahë Rusinë, për këtë arsye Ukraina nuk ka pse të shqetësohet për pozicionin e Serbisë në lidhje me çështjen e njohjes së Kosovës.

Goncharenko në “Interaktiv” të KTV-së e ka quajtur Serbinë “Kalë të Trojës” në mes të Evropës.

“Serbia po vepron si ‘Kali i Trojës’ në mes të Evropës. Është ‘Kali i Trojës’ i Putinit, kështu e mendoj. Të thuhet se Serbia do që të bëhet pjesë e BE-së derisa njëkohësisht shohim veprime publike e shumë fjalë në përkrahje të Putinit...deklarata të çuditshme të presidentit Vuçiq. Pata reaguar ndaj deklaratave të tij para një muaji, e pas kësaj pati reagim shumë të madh nga Ministria e Brendshme dhe ajo e Jashtme e Serbisë ndaj meje personalisht, e edhe z. Vuçiq e kishte komentuar. Por u përpoqën që pozicionin e tyre ta lënë të paqartë, porse për mua të gjitha janë të qarta: ata në të vërtetë janë duke e përkrahur Putinin. Kaq!” – tha Goncharenko.

Ndërkohë Goncharenko ka thënë se i është mirënjohës Kosovës për përkrahjen.

“I jam mirënjohës popullit të Kosovës për përkrahjen që ia bëjnë Ukrainës. Kam disa miq në Kosovë dhe e di se në shoqëri ka përkrahje të madhe për Ukrainën dhe për ne. U jemi falënderues. Është me rëndësi dhe e çmoj pozicionin e autoriteteve kosovare”, tha ai.

Goncharenko: Lufta në Ukrainë do të zgjasë shumë

Deputeti ukrainas Oleksyi Goncharenko beson se lufta në Ukrainë do të zgjasë shumë.

Ai thotë se do të kishte dëshirë që të mos kishte filluar lufta fare. Porse, thotë se për Ukrainën është jetike dhe nuk mund ta humbë këtë luftë.

“Dua t’ju them se do të kisha pasur dëshirë që lufta të mos kishte nisur fare apo të kishte përfunduar që dje, por në të vërtetë kujtoj se duhet të përgatitemi pasi kjo luftë do të zgjasë shumë. Kjo për shkak se për Ukrainën është jetike: është të jesh ose të mos jesh”, ka thënë Gonchanreko në “Interaktiv” të KTV-së. “Rusia po kryen gjenocid ndaj ukrainasve në territoret e okupuara dhe e kemi shumë të qartë se çfarë na pret po qe se dështojmë. Por ne nuk do të dështojmë”.

Goncharenko ka thënë se shumë kanë besuar se Rusia do ta pushtonte Kievin brenda pak ditëve, porse e ka humbur betejën për Kievin.

Ai thotë se Rusia ka pësuar shumë humbje, por ka okupuar një pjesë të Ukrainës në jug dhe juglindje.

Ai ka thënë se Ukraina duhet të përgatitet për një luftë të gjatë, ndërsa për këtë i duhet ndihma e aleatëve ndërkombëtarë.

“Ndalja e “blic-krigut”, kjo ishte ndërmarrje e jona, dhe ukrainasit e bëmë këtë. I ndalëm rusët. Për ta mbijetuar luftën, kemi nevojë për përkrahjen e Perëndimit, në fakt të botës së lirë, sepse e kemi përkrahjen e Japonisë, Australisë, Zelandës së Re dhe shteteve të tjera. Bota e lirë u bashkua rreth Ukrainës dhe po na përkrah dhe jemi shumë falënderues për këtë. Por kemi nevojë për më shumë, për shkak se ndonjëherë duket se disa shtete ngurrojnë më shumë se tjerat”, ka thënë Gonchanreko.

Goncharenko ka thënë se e pengon fakti se jo të gjitha shtetet perëndimore e kuptojnë se si duhet të përfundojë lufta në Ukrainë.

“Disa liderë perëndimorë, si Boris Johnson, apo cilido kryeministër që do ta pasojë, Britania është përkrahëse e fuqishme e Ukrainës; si Ursula Von der Leyen, Andrej Duda, kryetari i Polonisë dhe shumë të tjerë, e thonë qartazi se Ukraina duhet ta fitojë, që nënkupton çlirimin e të gjitha territoreve dhe rikthimin e rendit ndërkombëtar. Liderë të tjerë, siç është Olaf Scholz, kancelari i Gjermanisë thonë: ‘Putini nuk duhet të fitojë’ dhe kjo nuk është njësoj. Nuk është njësoj ‘Ukraina duhet të fitojë’ dhe ‘Rusia nuk duhet të fitojë’, sepse me ‘të mos fitojë’ mund të okupojë territore, apo edhe te kryejë gjenocid. Ky është problem dhe shpresoj se më në fund bota e lirë do të bashkohet rreth një ideje të qartë, se e vetja mënyrë për ta riinstaluar rendin ndërkombëtar dhe për ta kthyer normalitetin është fitorja e Ukrainës. Krejt skenarët e tjerë janë të këqij”, ka thënë Goncharenko.

Deputeti ukrainas ka shtuar se nëse Evropa nuk bashkohet rreth Ukrainës, atëherë nesër duhet të flijojë njerëzit e vetë, pasi presidenti rus Vladimir Putin nuk do të ndalet.

“E vetmja mënyrë që t’i kthehemi normales është që t’i shkaktojmë disfatë të plotë Rusisë. Me disfatë të plotë nënkuptoj të parandalohet marrja e cilitdo territor të Ukrainës. Ne nuk kemi pretendime ndaj territorit rus, por duam t’i çlirojmë territoret tona. E nëse Putini dëshmohet i suksesshëm, atëherë do të shkojë tutje dhe do ta sulmojë direkt Evropën, e pas kësaj nuk do të jetë më çështje e parasë apo e problemeve ekonomike do të jetë sikurse në Ukrainë: me mijëra e dhjetëra mijëra njerëz të vrarë dhe këtë nuk dua që ta shoh në Evropë”, ka thënë Gonchanreko në “Interaktiv” të KTV-së.

Ai thotë se është një shtet i BE-së që ngurron ta përkrahë Ukrainën, Hungaria.

Ndërsa për shtetet tjera ai thotë se janë pak a shumë përkrahëse të Ukrainës.

“Besoj se bota e lirë është aq e mençur dhe e fortë sa për t’u bashkuar e ndaluar një diktator të marrë”, ka thënë Goncharenko.

Goncharenko: Ukraina ka nevojë për ndihmë

Deputeti ukrainas Oleksyi Goncharenko ka thënë se Ukraina ka nevojë për çdo lloj ndihme.

Ai ka thënë se Ukrainës i duhet edhe ndihma humanitare.

Ai në Interaktiv të KTV-së ka shtuar se do të ishte i lumtur nëse organizata në Kosovë do të ndihmonin.

“Gjendja ekonomike e shtetit është e tmerrshme. Ekonomia e shtetit është shkatërruar. Për çdo ditë po i humbin njerëzit tanë më të mirë, heronjtë tanë. Pra, situata është tepër e rëndë dhe e mirëpresim çfarëdo ndihme që na vjen. Edhe ndihma humanitare na duhet shumë. Do të ishim të lumtur po qe se ka organizata në Kosovë që do të na ndihmonin, kemi rrjet të madhe qendrash. Po ju ftoj të më kontaktoni, të na bashkoheni për të na ndihmuar. Situata është shumë e rëndë. Por Ukraina do të fitojë! Kjo është e sigurt. Ashtu siç ishte për popullin e Kosovës para më shumë se 20 vjetësh, e njëjta është tash për ukrainasit. Kjo është jetike”, ka thënë Goncharenko.

Ai ka treguar se kishte qenë në Kosovë në vitin 2008, ku kishte vizituar Prishtinën e Prizrenit.

“Dua t’ju them se Prizreni është një ndër qytetet më të bukura që kam parë në jetën time. I uroj gjitha të mirat popullit të Kosovës”, ka thënë Goncharenko.

Deputeti ukrainas Oleksyi Gonchanreko ka thënë se nëse Ukraina do ta njohë Kosovën apo jo do të vendoset nga presidenti Volodymyr Zelensky.

Ai ka thënë se Zelensky ka shumicën në Parlamentin e Ukrainës. Por, Gonchanreko në “Interaktiv” të KTV-së ka thënë se nga diskutimet që ka pasur me deputetë, shumë prej tyre kanë përkrahur rezolutën.

“Gjëja më e rëndësishme është pozicioni i presidentit sepse ai ka shumicën në Parlament dhe ata do të presin qëndrimin e presidentit. Në diskutimet private, sepse Parlamenti nuk është mbledhur prej se e kam deponuar këtë rezolutë, pra në bisedat private shumë deputetë po tregojnë përkrahje për këtë rezolutë. Nuk e kam kontaktuar presidentin Zelensky. Propozimi është dorëzuar në Parlament dhe tash duhet të marrin qëndrime mbi këtë dhe kjo është situata. Shpresoj se do të marrin qëndrime dhe do ta përkrahin propozimin tim”, tha Goncharenko.

I pyetur nëse Zelensky do të vendosë ta njohë shpejt Kosovën.

“Nuk e di. Porse pozicioni im është i qartë dhe kam vendosur ta bëj zyrtar, ashtu që t’i jap rast Qeverisë ukrainase që më në fund ta marrë një pozicion. Se çfarë do të bëjnë, nuk e di. Është punë e Qeverisë dhe nuk mund ta komentoj se çfarë do të bëjnë. Po shpresoj, sepse tash e kemi një debat publik për këtë çështje në Ukrainë dhe kjo është me rëndësi, ngase jemi shtet demokratik dhe në shtet po zhvillohet një debat, pas paraqitjes sime, nëse është mirë ose jo për Ukrainën që ta njohë Kosovën. Disa flasin për rrethanat që jua shpjegova; disa janë të brengosur me pozicionin e Republikës së Serbisë, në mos pas kësaj Serbia do t’i njohë Donetskun dhe Luhanskun si të ashtuquajtura republika, që janë fals, porse e besoj se sidoqoftë”, ka thënë Goncharenko.

Deputeti ukrainas Oleksyi Goncharenko ka treguar arsyet që e kanë shtyrë që të dorëzojë një rezolutë në Parlamentin e Ukrainës ku kërkon njohjen e pavarësisë së Kosovës.

Goncharenko të shtunën bëri bujë duke njoftuar në Twitter se ka deponuar një rezolutë në Parlamentin e Ukrainës ku ka kërkuar njohjen e pavarësisë së Kosovës.

Ai pak orë më pas kishte njoftuar se është kërcënuar nëpërmjet rrjeteve sociale nga serbët.

Goncharenko në Interaktiv të KTV-së ka treguar se qëllimi i rezolutës së propozuar është që më në fund ta shtyjë Ukrainën që ta njohë shtetësinë e Kosovës.

“Është në të vërtetët mjaftë e thjeshtë. Po e përmendi vendimin e Gjykatës Ndërkombëtare të Drejtësisë të Kombeve të Bashkuara dhe gjithë situatën që ka ndodhur në Kosovë. Dhe, i kam propozuar Parlamentit të Ukrainës ta adoptojë një rezolutë për njohje të Kosovës si shtet të pavarur e sovran. Kështu që nuk është një rezolutë e madhe. Por qëllimi është mjaftë i qartë. Deri më tash Ukraina nuk e ka njohur si shtet të pavarur dhe sovran dhe mendoj se është diçka që duhet të ndryshojë dhe ne duhet ta bëjmë këtë gjë tash. Ky është qëllimi i rezolutës që kam propozuar”, tha Goncharenko.

Ai ka thënë se Ukraina duhet ta njohë Kosovën, pasi gjithë ato hezitime që kishte, se Rusia mund të përdorë një paralele mes Kosovës dhe Donbasit e Krimesë, kanë ndryshuar pas 24 shkurtit. Ai ka thënë se Ukraina duhet ta shohë hartën e shteteve që e kanë njohur Kosovën dhe të veprojë njëjtë.

“Mendoj se pas 24 shkurtit, çdo gjë për gjithë botën u bë absolutisht e qartë: Në Ukrainë ne kemi një situatë tërësisht ndryshe. Në Ukraine ne kemi pushtim nga fqinji ynë, që është agresori – Rusia, dhe është absolutisht ndryshe me atë se çfarë ka ndodhur më shumë se 20 vjet më parë në Kosovë. Prandaj, mendoj se duhet ta njohim Kosovën, sepse nëse po ashtu shikoni hartën e vendeve që tashmë e kanë njohur Kosovën si shtet të pavarur, janë po të njëjtat vende që po përkrahin Ukrainën - kjo është bota e lirë. Është SHBA-ja, Kanadaja, Mbretëria e Bashkuar, Franca, Gjermania dhe 22 nga 27 vendet e Bashkimit Evropian, në të cilën Ukraina është bërë shtet kandidat së fundmi vetëm para një muaji. Dhe, prandaj duhet ta bëjmë këtë hap tash sepse pas 24 shkurtit, të gjitha brengat që i kishim janë të sajuara. Pra se njohja e pavarësisë mund të jetë dëm për Ukrainën”, ka thënë Goncharenko.

Ai po ashtu ka folur për paralelet që ngre ministri i Jashtëm i Rusisë, Sergey Lavrov mes Kosovës dhe Donbasit.

“Së pari, do ta pyesja zotëri Lavrov: Pse Rusia nuk po e njeh pavarësinë e Kosovës? Por, është e qartë se kemi të bëjmë me një paralele të rrejshme. Absolutisht paralele e rrejshme sepse çfarë ka ndodhur në Ukrainë është një pushtim. Ky pushtim filloi më 2014, së pari u pushtua Krimea, pastaj një pjesë e Donbasit, tash edhe më shumë territore ukrainase janë të pushtuara. Dhe çfarë ndodhi në Kosovë: ishte një situatë ku 90 për qind e njerëzve ishin të kërcënuar të kryhej gjenocid ndaj tyre. Në tokën e tyre. Ai ishte hapi që të mbroheshin njerëzit, të ndalohej gjenocidi atje. Dhe kjo është krejtësisht ndryshe sepse këtu nuk janë rusë. Janë rusfolës. Unë flas rusisht. Gjuha ime e parë është rusishtja. Por, nuk kam ndonjë problem në Ukrainë. Shteti i Ukrainës gjithnjë i ka respektuar ata që flasin rusisht, më ka respektuar mua dhe më respekton edhe tash. I respekton të gjitha të drejtat e mia dhe unë jam i lumtur për këtë. Ky nuk ishte rasti me shqiptarët që jetonin në Kosovë, duke qenë pjesë e Serbisë. Kjo është e qartë. Gjitha këto paralele janë të tërësisht rrejshme. Në Ukrainë kemi një pushtim, në Kosovë kemi vetëvendosje të njerëzve, të cilët u shtynë madje nga një regjim kriminal ndaj tyre, nga qeveria e shtetit në të cilin kishin jetuar”, tha Goncharenko.

© KOHA. Të gjitha të drejtat janë të rezervuara.