Ministria e Shëndetësisë ka apeluar te qytetarët që të rrisin kujdesin, të bartin maskat në ambiente e mbyllura dhe ku ka grumbuj të njerëzve, pas rritjeve të rasteve me COVID-19 dhe shtrimeve në spital si pasojë e infeksionit.
Sipas njoftimit të MSH-së të premten, qytetarët duhet të rrisin kujdesin dhe të zbatojnë masat anti-COVID që janë fuqi. U bëhet thirrje personave mbi 60-vjeç ta marrin edhe dozën e katërt të vaksinës.
“Me qëllim të mbrojtjes së shëndetit publik, ministri Latifi u bën thirrje qytetarëve që të rrisin kujdesin, të zbatojnë masat në fuqi kundër COVID-19, të përditësuara së fundi më 30 prill 2022 dhe t’u përgjigjen thirrjeve për vaksinim kundër COVID-19, duke përfshirë edhe marrjen e dozës së katërt, që është lejuar për personat mbi 60 vjeç, të cilat e kanë marrë dozën e tretë së paku katër muaj më parë. Në veçanti, i bëhet thirrje kësaj grup-moshe dhe personave me imunitet të komprometuar, që të shmangin qëndrimet në ambiente ku ka grumbullim të njerëzve, përderisa rekomandohet bartja e maskës në ambiente të mbyllura dhe vaksinimi për grup-moshat e lejuara që të vaksinohen”, thuhet në njoftim.
MSH-ja gjithashtu apeloi edhe te institucionet publike e private dhe veprimtaritë ekonomike që të zbatojnë masat anti-COVID të cilat janë në fuqi nga 30 prilli.
“Me qëllim të ruajtjes së shëndetit publik, u bëhet thirrje të gjitha institucioneve publike dhe private, veprimtarive ekonomike, në veçanti sektorit të gastronomisë, sektorëve të kulturës, sportit si dhe të gjitha veprimtarive të tjera, që të zbatojnë masën në fuqi që të punësuarve, klientëve dhe pjesëmarrësve në aktivitete dhe veprimtari përkatëse, t’u kërkohet dëshmia e marrjes së dy dozave të vaksinës kundër COVID-19, përveç personave nën moshën 16 vjeç dhe personave të liruar nga vaksinimi sipas kundër-indikacioneve për vaksinim me dëshmi të mjekut”, vijon njoftimi.
MSH-ja, sipas masave në fuqi, u rekomandoi qytetarëve bartjen e maskave mbrojtëse në hapësira të brendshme si dhe vaksinimin me dozat e vaksinës sipas grup-moshave të lejuara për vaksinim.
Për shtrëngimin e masave, MSH-ja thotë se mund të bëhen sipas rekomandimeve të institucioneve relevante dhe ekspertëve, në varësi të situatës epidemiologjike dhe projeksioneve rreth zhvillimit të saj.
© KOHA. Të gjitha të drejtat janë të rezervuara.
