Arbëri

​Kamberi: Zotohem t'i mbroj interesat e shqiptarëve të shtypur dhe të diskriminuar

Shaip Kamberi është rizgjedhur deputet në Kuvendin e Serbisë. Kjo është arritur vetëm pas përsëritjes së zgjedhjeve në një shkollë në Tërnovc të Bujanocit. Menjëherë pasi u kuptua për rezultatin, Kamberi tha se përkundër politikës dhe veprimeve penguese të pushtetit serb, shqiptarët nuk mbeten pa deputet në parlamentin e ri të Serbisë.

Ai tha se kjo po ndodhë falë vullnetit të shqiptarëve të Luginës së Preshevës dhe punës së palodhshme të aktivistëve dhe simpatizuesve, atyre të Koalicionit të Shqiptarëve të Luginës e përkrahjes së madhe nga kudo ku përqafohen vlerat e demokracisë liberale.

“Përgjegjësitë janë të mëdha. Problemet janë të shumta. Konteksti është i vështirë. Por me punë dhe unitet do t'ia dalim. Zotohem se do të jem deputet i të gjithëve. Zotohem se do t’i mbrojë interesat e qytetarëve që duan të drejta dhe mirëqenie. Interesat e shqiptarëve të shtypur dhe të diskriminuar. Zotohem se do ta ndjek politikën e orientimeve pro-perëndimore, për paqe të qëndrueshme në rajon”, deklaroi Kamberi.

Gjatë ditës së enjte, në Tërnovc u mbajtën zgjedhjet për herë të pestë pasi për shkak të parregullsive u urdhërua përsëritja.