Kryetari i Prizrenit, Shaqir Totaj, ka raportuar në Polici se është kanosur nëpërmjet telefonit nga ish-deputeti Zafir Berisha.
Siç ka njoftuar Policia e Kosovës rasti është raportuar të shtunën, ndërsa është njoftuar se ka pasur kanosje përgjatë tri ditëve.
I dyshuari, Berisha, pas intervistimit është liruar në procedurë të rregullt.
“Më datën 25.06.2022, viktima ka raportuar rastin në Polici se ka qenë i kanosur përmes telefonit nga një i dyshuar Z.B. për tri ditë. Pas pranimit të informatës, viktima është intervistuar lidhur me këtë rast, është njoftuar prokurori kujdestar i cili ka dhënë urdhër që të intervistohet i dyshuari. Hetuesit nga Sektori i Hetimeve Rajonale e kanë shoqëruar të dyshuarin, i cili është intervistuar dhe pas intervistimit është liruar në procedurë të rregullt. Në konsultim me prokurorin kujdestar, rasti është iniciuar si ‘kanosje’. Rasti është duke u hetuar nga Njësiti i Hetimeve Rajonale në Prizren”, ka njoftuar për KOHËN zëdhënësi i Policisë së rajonit të Prizrenit, Vesel Gashi.
Për këtë rast ka reaguar Berisha, i cili nëpërmjet një postimi në Facebook, këto pretendime i ka quajtur konspiracione dhe gënjeshtra.
“Pasi disa sms që më prishën koncentrimin në një filmi shumë interesant, desha t’i pyes konspiracionistët dhe ata që “marrin vesh” në “lajme për lice”, a ka edhe ndonjë rren pa dalën në adresë time a jo? Nëse ka, le ti “zbulojnë” para se me ik në pushime, se po më duket sivjet edhe detin kanë vendos mos të më lënë ta shijoj si duhet”, ka shkruar ai.
© KOHA. Të gjitha të drejtat janë të rezervuara.
