I dërguari i posaçëm i Bashkimit Evropian në dialogun Kosovë-Serbi, politikani sllovak, Miroslav Lajçak, në një intervistë për “Klubin e Debatit Publik”, ka folur me optimizëm se së bashku me përfaqësuesin amerikan për Ballkanin Perëndimor, Gabriel Escobar, kanë për të përfunduar me sukses mandatin e tyre me një “marrëveshje gjithëpërfshirëse, juridikisht të detyrueshme për normalizimin e marrëdhënieve ndërmjet Kosovës dhe Serbisë”.
Ai mohoi zërat e shumtë se dialogu i deritashëm nuk ka dhënë rezultate.
“ Zotërinjtë Lajçak dhe Escobar personalisht kanë bashkëpunim të shkëlqyeshëm. Kemi të njëjtin mandat dhe të njëjtin qëllim. Qëllimi ynë është të kemi sukses, ta mbyllim këtë proces, procesin e normalizimit dhe më duhet të them se këtë proces e drejton Bashkimi Evropian, por të cilin e mbështesin shumë fuqimisht Shtetet e Bashkuara të Amerikës. Ky është parakusht për sukses“ , u shpreh Lajçak.
Atij së fundi iu zgjat mandati edhe për 18 muaj në këtë post.
Diplomati sllovak duke folur për zvarritjen e integrimit evropian të Ballkanit Perëndimor, tha se “lufta në Ukrainë ia hapi sytë shumëkujt në Bashkimin Evropian, të cilët mendonin se rajoni është i sigurt, se mund të presë dhe se nuk ka ku të shkojë. Tani u bë e qartë se ne duhet të përfundojmë procesin e integrimit”.
Ai ka thënë se aspiratat e Ballkanit Perëndimor janë absolutisht legjitime dhe të logjikshme. Sipas tij, për rajonin nuk ka të ardhme më të mirë sesa e ardhmja evropiane dhe Ballkani Perëndimor është i vetmi rajon që ka premtimin e Bashkimit Evropian që të gjitha vendet e tij të bëhen anëtare me të drejta të plota.
“Bashkimi Evropian është shumë i pranishëm gjithandej në rajon. Është fakt se Bashkimi Evropian pret që vendi i cili shpallë se dëshiron të bëhet anëtar i BE-së, duhet ta dëshmojë se këtë e ka prioritet. Mirëpo, këtu vazhdon të ketë shumë çështje të pazgjidhura nga e kaluara. Lufta jugosllave përfundoi para 27 vjetësh, ka mbi 20 vjet nga intervenimi i NATO-s në Kosovë dhe Serbi, por e kaluara edhe më tej është e pranishme në ditët e sotme dhe pengon rrugën për një të ardhme më të mirë”, ka thënë ai.
Lajçak ka thënë se Bashkimi Evropian është aktivisht i angazhuar edhe kur është fjala për dialogun për normalizimin e marrëdhënieve ndërmjet Kosovës dhe Serbisë, edhe sa i përket funksionimit të shtetit të Bosnjë-Hercegovinës dhe në çdo shtet të Ballkanit Perëndimor, BE-ja është forca kryesore.
“Objektivin nuk do ta arrijmë duke kritikuar njëri-tjetrin. Ne vërtet duhet të bashkëpunojmë. Edhe njëra, edhe pala tjetër duhet të bëhen serioze, sepse e kam thënë se nuk ka alternativë më të mirë. Lufta në Ukrainë ia hapi sytë shumëkujt në Bashkimin Evropian”, ka thënë ai.
