Kryesuesi i Bordit të Zyrës së Rregullatorit të Energjisë (ZRRE), Ymer Fejzullahu, ka thënë se vendimi i Gjykatës Themelore, i vërtetuar nga ajo e Apelit, është duke u zbatuar.
Sipas vendimit të gjykatës, ZRRE-ja duhet të pezullojë vendimin për tarifat e reja deri në shqyrtim përfundimtar.
Fejzullahu nuk deshi të prononcohet më gjatë pas raportimit në Komisionin për ekonomi, por me insistim të gazetarëve i tha 2-3 fjali.
Foli pak edhe për kërkesën e KESCO-s për sqarime në lidhje me pezullimin e tarifave të reja. Për këtë tha se, KESCO duhet t’i drejtohet gjykatës.
Ndërkohë kryetari i Komisionit për Ekonomi, Ferat Shala, tha pas raportimi të Bordit të ZRRE-së, se vendi aktualisht është pa tarifa.
Sipas tij, ZRRE-ja nuk ka ofruar asnjë zgjidhje për situatën e krijuar.
10:46
Bordi i ZRRE-së nis raportimin në komision pa praninë e mediave
Bordi i Zyrës së Rregullatorit të Energjisë (ZRRE) ka filluar raportimin në Komisionin parlamentar për Ekonomi lidhur me vendimin e Gjykatës së Apelit, që konfirmoi atë të Gjykatës Themelore për pezullimin e faturave me çmim të rritur.
Raportimi po bëhet pa praninë e mediave në sallë.
Kryesuesi i kësaj mbledhje, deputeti i PDK-së, Ferat Shala, kërkoi që mediat të cilat ishin të pranishme ta lëshojnë sallën.
Ai bashkë me kolegen nga radhët e LDK-së, Valentina Bunjaku-Rexhepi, thanë se pas mbledhjes do të jenë të dispozicion për çdo pyetje nga gazetarët.
