Arbëri

Gashi-Bytyqi: Me këtë vendim Gucati e Haradinaj do të duhej të vazhdonin të mbroheshin në liri

Avokatja Fehmije Gashi-Bytyqi, ka thënë se me vendimin e sotëm të Gjykatës Speciale për ish-drejtuesit e Organizatës së Veteranëve të Luftës të UÇK-së, Hysni Gucati e Nasim Haradinaj, ata do të duhej të vazhdonin të mbroheshin në liri deri në aktgjykimin e formës së prerë.

Gashi-Bytyqi ka shpjeguar të mërkurën në “60 Minuta” të KTV-së, se sipas Kodit të Procedurës Penale të Kosovës, çdo person që dënohet me më pak se 5 vjet burgim, vazhdon mbrojtjen në liri deri në aktgjykimin e formës së prerë.

“Një defekt që është bërë proceduralisht ka qenë fakti që në praktikën gjyqësore të Kosovës, personat e pandehur, sipas kodit të procedurës penale, kur dënohen nën 5 vite, ju ndërpritet masa e paraburgimit derisa aktgjykimi ta marrë formën e prerë. Atyre edhe pse iu dhanë 4 vjet, ata mbetën në paraburgim. Por prapë ne nuk kemi qasje në rregulloren se si veprohet gjatë gjykimit nga Gjykata Speciale ndonëse ajo është gjykatë e Kosovës. Po të kishte ekzistuar vullneti i Gjykatës Speciale, Gucati e Haradinaj do të mund të mbroheshin në liri derisa aktgjykimi të merr formën e prerë”, ka shpjeguar Gashi-Bytyqi.

Ajo ka shtuar se nuk ka parë prova të mjaftueshme për dënimin e Gucatit dhe Haradinaj, aq më pak jo me aq vjet burgim sa u dënuan.

Sipas saj, Gjykata Speciale para se të merrte vendimin e sotëm është dashur që të hetojë se si kanë rrjedhur dokumentet e saj, për të cilat janë dënuar Gucati e Haradinaj.

“Prokuroria Speciale dhe Gjykata Speciale është dashur që para se ta marrin vendimin e sotëm të hetojnë se si kanë rrjedhur këto dokumentet nga zyrat e tyre pasi ende ekziston një person anonim i cili i ka sjellë ato dokumente. Unë nuk jam në dijeni se ka ndonjë dëshmitar konkret që ka thënë se shkaku i atyre dokumenteve është zbuluar identiteti. Nëse del vendimi se shkaku këtyre dokumenteve është rrezikuar dëshmitari me i caktuar, vendimi e ka një arsyeshmëri, ndërsa shprehja vetëm dëshmitarët është një përgjithësim”, është shprehur avokatja Gashi-Bytyqi.

Ish-drejtuesit e Organizatës së Veteranëve të Luftës së Ushtrisë Çlirimtare të Kosovës, Hysni Gucati e Nasim Haradinaj janë dënuar me nga katër vjet e gjysmë burgim nga Gjykata Speciale. Gucati e Haradinaj u dënuan për publikimin e dokumenteve të Speciales. Dokumentet ishin sjellë nga persona të panjohur në zyrat e OVL-së së UÇK-së gjatë vitit 2020.

Në dënim do t’u përllogaritet koha e kaluar në paraburgim nga shtatori i vitit 2020.

Gucati e Haradinaj u shpallën fajtorë për pengim të personave zyrtarë në kryerjen e detyrave zyrtare, frikësim gjatë procedurës penale dhe shkelje të fshehtësisë së procedurës. Ata u shpallën të pafajshëm për veprën e hakmarrjes.

Trupi gjykues i dënoi të dy edhe me nga 100 euro gjobë.

Gucati dhe Haradinaj u arrestuan në shtator të vitit 2020, pas dyshimeve se në disa konferenca për media në selinë e OVL-UÇK në Prishtinë kanë shpërndarë dokumente të klasifikuara të Dhomave të Specializuara, që njihen edhe si Gjykata Speciale.